«Չելսիի» լեգենդ և Անգլիայի ազգային հավաքականի նախկին պաշտպան Ջոն Թերին Իսպանիային համարում է աշխարհի 2026 թվականի առաջնության եզրափակիչի ֆավորիտ։
«Ինձ համար ֆավորիտն Իսպանիան է։ Երկու թիմերն էլ շատ հարմարավետ են զգում իրենց գնդակով և լավ են տիրում դրան։ Բայց անգլիացիների դեմ խաղում արգենտինացիների մոտ ամեն ինչ կառուցվում էր Լիոնել Մեսսիի աջ եզրով։ Ամեն անգամ, երբ նրանք տեղափոխվում էին ձախ եզր, գնդակը շատ արագ վերադառնում էր աջ։ Մարկ Կուկուրելյան ճանաչվել է Ֆրանսիայի դեմ կիսաեզրափակիչի լավագույն ֆուտբոլիստ, իսկ Իսպանիայի հավաքականը շատ ուժեղ տեսք ունի ձախ եզրում։
Բացի այդ, իսպանացիները ոչ մի գոլ բաց չեն թողել Ֆրանսիայից և գրեթե գոլ բաց չեն թողնում մրցաշարում, ինչն անհավանական է։ Արգենտինացիները մեծ սպառնալիք են ներկայացնում։ Ինչպես տեսանք մրցաշարի ընթացքում, նրանք միշտ ելք են գտնում բարդ իրավիճակներից։ Երբ քո կազմում կա Մեսսիի պես կախարդ, դու միշտ շանս կունենաս։ Բայց կարծում եմ, որ Իսպանիան չափազանց ուժեղ է այս Արգենտինայի համար։ Ընդ որում, արգենտինացիներն անգլիացիների դեմ ցույց տվեցին մի բան, որով քիչ թիմեր կարող են պարծենալ՝ տոկունություն և համառություն։ Նրանց խաղում ինձ հատկապես դուր եկավ այն, որ յուրաքանչյուր սահանկումից հետո բոլոր ֆուտբոլիստներն անմիջապես վազում էին և փոքրիկ քաշքշուկ ստեղծում։
Նրանք շատ համախմբված են, նրանց մեջ տոկունություն էր զգացվում, բայց, այնուամենայնիվ, ենթադրում եմ, որ Իսպանիան հաղթանակ կտանի»,- Թերիի խոսքերն է մեջբերում Metro պարբերականը։
Աշխարհի 2026 թվականի առաջնության եզրափակիչ հանդիպումն Իսպանիայի և Արգենտինայի հավաքականների միջև կկայանա հուլիսի 19-ին։
