Անգլիայի ազգային հավաքականը պատրաստվում է ԱԱ-2026-ի կիսաեզրափակչի՝ Արգենտինայի դեմ սպասվող գերլարված դիմակայությանը։
Թիմի առաջատարներից Ջուդ Բելինգհեմն ակտիվորեն նախապատրաստվում է այս կարևորագույն հանդիպմանը։ Վերջերս կիսապաշտպանը սոցիալական ցանցերում լուսանկար էր հրապարակել թթվածնային դիմակով, ինչը որոշակիորեն զարմացրել ու հարցեր էր առաջացրել երկրպագուների շրջանում։
Իրականում, սա առաջին դեպքը չէ, երբ Անգլիայի հավաքականի աստղը նման դիմակ է կրում. այն ողջ մրցաշրջանի ընթացքում ֆուտբոլիստի վերականգնման գործընթացի անբաժանելի մասն է:
Տրավմատոլոգ Խուան Արնալը պարզաբանել է, որ դիմակի այս տեսակը նման է պրոֆեսիոնալ մարզիկների շրջանում լայն տարածում գտած հիպերբարիկ խցիկներին։ Այն հիմնված է մթնոլորտային ճնշման բարձրացման վրա, ինչը նպաստում է օրգանիզմի կողմից թթվածնի առավելագույն յուրացմանը։
«Կան ապացուցված փաստեր, որ թթվածնի մետաբոլիկ մատակարարման աճն արագացնում է մկանային վնասվածքներից և ծանրաբեռնվածությունից հետո վերականգնման պրոցեսը»,- ընդգծել է բժիշկը:
Ըստ մասնագետի՝ ֆուտբոլիստների շրջանում սա բավականին տարածված պրակտիկա է դարձել։ Ներկայումս մկանային միկրովնասվածքների և գերհոգնածության դեպքում թթվածնի լրացուցիչ մատակարարումը հաճախ համատեղվում է հիպերբարիկ խցիկների կիրառման հետ, քանի որ երկու պրոցեդուրաներն էլ հետապնդում են նույն նպատակը՝ օգնել մարզիկին հնարավորինս արագ վերականգնել ուժերն ու պատրաստ լինել հաջորդ հանդիպմանը։
