Ֆրանսիայի հավաքականի աստղ Կիլիան Մբապեի և պարագվայցի պաշտպան Խուան Կասերեսի միջև խաղադաշտում ծագած լեզվակռիվը ԱԱ-2026-ի 1/8 եզրափակչի ամենաքննարկվող դրվագներից է դարձել։
Մինչ ֆրանսիացի հարձակվողը մրցակցին մեղադրում է «կեղտոտ խաղի» մեջ, Կասերեսը վստահեցնում է՝ իրենք պարզապես արել են իրենց գործը։ Ֆիլադելֆիայում կայացած լարված դիմակայությունում Դիդիե Դեշամի սաները նվազագույն՝ 1:0 հաշվով դժվարին հաղթանակ կորզեցին։
«Բարեբախտաբար, Կիլիանը հիմնականում կենտրոնով էր գրոհում, ոչ թե իմ եզրով։ Ամեն դեպքում, ստիպված էի անընդհատ շնչել նրա ծոծրակին ու ճնշում գործադրել, այլապես նրան կանգնեցնելն անհնար կլիներ»,- անկեղծանում է Կասերեսը TyC Sports-ի հետ զրույցում։
Խաղադաշտում կրքերն այնքան են թեժացել, որ ֆուտբոլիստների միջև զավեշտալի ու սուր երկխոսություն է տեղի ունեցել.
«Խաղադաշտի աղմուկի պատճառով հազիվ էի լսում նրա խոսքերը։ Մի պահ նա շրջվեց ու վրդովված հարցրեց. «Ի՞նչ է, ուզում ես ինձ համբուրե՞լ»։ Ես էլ չկորցրեցի ինձ ու պատասխանեցի. «Դե, քանի որ արդեն այստեղ ես…» (ծիծաղում է)։ Նա բողոքում էր, թե մենք կոպիտ ու կեղտոտ ենք խաղում, բայց իրականում մենք ընդամենը մեր աշխատանքն էինք կատարում»,- վերհիշում է պարագվայցին։
Չնայած ցավալի պարտությանը՝ Կասերեսը հպարտանում է իր թիմի նվիրվածությամբ.
«Մենք մեր ամբողջ հոգին դրեցինք խաղադաշտում: Ամեն մի փոքրիկ դրվագում կռիվ էինք տալիս այնպես, կարծես դա աշխարհի առաջնության եզրափակիչը լիներ։ Այո, զիջեցինք, բայց արժանապատվորեն պայքարեցինք մինչև վերջին վայրկյանը»։
Նշենք, որ 1/4 եզրափակչում Ֆրանսիայի հավաքականին սպասվում է ևս մեկ ծանր փորձություն. հուլիսի 9-ին Բոստոնում նրանք ուժերը կչափեն Մարոկկոյի անզիջում ընտրանու հետ:
