Պորտուգալիայի ազգային հավաքականի ավագ և հարձակվող Կրիշտիանու Ռոնալդուն հայտարարել է, որ այս պահին դեռ վերջնական որոշում չի կայացրել ազգային թիմում կարիերան ավարտելու վերաբերյալ։
ԱԱ-2026-ի 1/16 եզրափակիչում պորտուգալացիները 2:1 հաշվով առավելության հասան Խորվաթիայի նկատմամբ։ Ռոնալդուն խաղադաշտում անցկացրեց 81 րոպե և աչքի ընկավ անվրեպ իրացված 11-մետրանոցով։ Նախքան հանդիպումը 41-ամյա ֆուտբոլիստի քույրը՝ Կատյա Ավեյրուն, լրագրողների հետ զրույցում նշել էր, թե Կրիշտիանուն Մունդիալ-2026-ից հետո կավարտի կարիերան հավաքականում։
«Իմ ապագան հիմա ոչ մի նշանակություն չունի։ Ես դեռ կարտահայտվեմ այդ թեմայով… Դրա համար ժամանակ կունենամ։ Հաղթանակից կամ պարտությունից հետո ես կխոսեմ ընտանիքիս հետ և ապա հանգիստ կկայացնեմ այն որոշումը, որը լավագույնը կհամարեմ։ Ես այլևս տաք գլխով որոշումներ չեմ կայացնում, հիմա ամեն ինչ պետք է լինի կշռադատված և առանց շտապելու։ Իսկ հիմա պետք է պարզապես վայելել այսօրվա օրը»,- Ռոնալդուի խոսքերն է մեջբերում A Bola-ն։
1/8 եզրափակիչում Պորտուգալիայի հավաքականը ուժերը կչափի Իսպանիայի ընտրանու հետ։ Պիրենեյան մեծ դերբին կկայանա հուլիսի 6-ին ԱՄՆ-ի Դալաս քաղաքում և կմեկնարկի Երևանի ժամանակով 23:00-ին։
