«Ոսկե գնդակի» հնգակի դափնեկիր Կրիշտիանու Ռոնալդուի քույրը՝ Կատյա Ավեյրուն, աղմկահարույց հայտարարություն է արել 41-ամյա հարձակվողի ապագայի վերաբերյալ։ Նրա խոսքով՝ ԱԱ-2026-ը կդառնա վերջին խոշոր մրցաշարը Ռոնալդուի համար՝ ազգային ընտրանու կազմում։
Ավեյրուն, ով ներկա է Կանադայում ընթացող աշխարհի առաջնության խաղերին, կիսվել է իր էմոցիաներով ու հաստատել երկրպագուների ամենամեծ վախերը. Կրիշտիանուն մոտ է միջազգային կարիերան ավարտելուն։
«Վայելե՛ք այս պահերը։ Հրաժեշտը ոչ այսօր է, բայց այդ օրն արդեն շատ մոտ է։ Ես վստահ եմ, որ սա հրաժեշտի մրցաշար է։ Խոսքս, իհարկե, ազգային հավաքականի մասին է, ոչ թե ակումբային կարիերայի։ Իմ վստահելի աղբյուրների տեղեկություններով՝ այս աշխարհի առաջնությունը նրա «վերջին պարն» է»,- Ավեյրուի խոսքերն է մեջբերում A Bola-ն:
Նա նաև հավելել է, որ Ռոնալդուին փոխարինող գտնելը անչափ բարդ է լինելու պորտուգալական ֆուտբոլի համար.
«Ամենակարևորն այն է, որ վայելենք այս ավելի քան 20 տարիները, որոնք մենք ապրեցինք նրա հետ հավաքականում։ Ես անհավանական հպարտ եմ. եղել եմ Կատարում, հիմա այստեղ եմ։ Կրիշտիանուն իրեն վստահ է զգում և ավելի քիչ է անհանգստանում, քան մենք»։
Կատյա Ավեյրուն չի շրջանցել նաև իր եղբոր հասցեին հնչող պարբերական քննադատությունները՝ կոշտ պատասխան տալով վերջիններիս.
«Ցանկացած խելացի մարդ, ով իսկապես սիրում է ֆուտբոլը, պետք է սիրի Ռոնալդուին։ Ի վերջո, հենց նրանք են տուժողի դերում։ Կրիշտիանուն գերիշխում է ֆուտբոլում արդեն ավելի քան երկու տասնամյակ։ Տեսեք, թե որտեղ է հիմա Ավեյրուների ընտանիքը և որտեղից ենք մենք սկսել մեր ուղին։ Տեսեք, թե ինչերի միջով է անցել մեր մայրը… Մի՞թե որևէ մեկը կարծում է, որ քննադատությունը կարող է խլել մեր երջանկությունը։ Երբե՛ք»,- ընդգծել է ֆուտբոլիստի քույրը։
ԱԱ-2026-ի 1/16 եզրափակչի շրջանակներում Պորտուգալիայի ընտրանին Տորոնտոյի «ԲՄՕ Ֆիլդ» մարզադաշտում ուժերն է չափում Խորվաթիայի հետ։
Խմբային փուլում թիմը զբաղեցրել է երկրորդ հորիզոնականը՝ վաստակելով 5 միավոր (հաղթանակ Ուզբեկստանի նկատմամբ՝ 5:0, և ոչ-ոքիներ Կոնգոյի ԴՀ-ի (1:1) ու Կոլումբիայի (0:0) հետ):
Բալկանյան թիմը L խմբում 6 միավորով նույնպես գրավել է երկրորդ տեղը:
Լեգենդար ֆուտբոլիստը մինչ այս պահը Պորտուգալիայի հավաքականի կազմում անցկացրել է 231 հանդիպում, դարձել 145 գոլի և 46 գոլային փոխանցման հեղինակ՝ նվաճելով Եվրո-2016-ի և Ազգերի լիգայի գավաթները: Նա Խորվաթիայի դեմ վճռորոշ խաղում ընդգրկված է մեկնարկային կազմում։
