Ֆուտբոլային փորձագետ Անդրեյ Սոզինը մեկնաբանել է «Կրասնոդարի» և Հայաստանի ազգային հավաքականի կիսապաշտպան Էդուարդ Սպերցյանի հավանական տեղափոխությունը սաուդյան «Ալ-Ահլի»։
«Շատերին Սպերցյանի՝ Սաուդյան Արաբիա մեկնելու որոշումը ոչ պոպուլյար կթվա։ Կասեն՝ չսպասեց Անգլիային, Իսպանիային կամ Իտալիային, գնաց փողի հետևից։ Նախ, փողի հետևից գնալը նույնպես մեծ բան է: Դա նույնպես նպատակ է, որից, ի դեպ, չեն խորշում համաշխարհային աստղերը, ովքեր հիմա խաղում են Աշխարհի առաջնությունում՝ լավագույն հավաքականների կազմում:
Սպերցյանն այժմ խաղալու է նրանց հետ և նրանց դեմ, ինչն այնքան էլ վատ չէ։
Երկրորդ՝ պետք չէ թերագնահատել Սերգեյ Գալիցկու գործոնը: Էդուարդի համար նա շատ նշանակալի մարդ է՝ հարգված և, կարծում եմ, նույնիսկ սիրված: «Կրասնոդարից» Սաուդյան Արաբիա տեղափոխվելը Գալիցկու կշռադատված որոշումն է։ Նա հասկանում էր, որ Եվրոպայից առաջարկների կարելի էր դեռ երկար սպասել, կամ դրանք կարող էին ընդհանրապես չլինել: Իսկ ֆինանսական տեսանկյունից դրանք հազիվ թե մոտ լինեին «Ալ-Ահլիի» առաջարկին։ Մենք [ռուսական ակումբները] որակազրկված ենք, Հայաստանի հավաքականը չի փայլում, ՌՊԼ-ն, այնուամենայնիվ, իր ներքին խոհանոցում եփվող լիգա է. ինչո՞ւ պետք է եվրոպական որևէ ակումբ մեծ գումար վճարեր Էդուարդի համար:
Սա ինքնաբուխ որոշում չէ, և Գալիցկին աջակցել է դրան: Սպերցյանը կխաղա համաշխարհային աստղերի հետ, կշարունակի միանալ հավաքականին և գումար կվաստակի ամբողջ կյանքի համար։ «Կրասնոդարն» էլ իր հերթին վաստակեց, իսկ Էդուարդն արդեն հասցրել էր նրանց չեմպիոն դարձնել:
Տա Աստված, որ Սպերցյանի մոտ ամեն ինչ ստացվի։ Կարող ենք միայն շնորհակալություն հայտնել նրան և հաջողություն մաղթել»,- Սոզինի խոսքերն է մեջբերում «Чемпионат»-ը։
Հիշեցնենք, որ Էդուարդ Սպերցյանը «Կրասնոդարի» ակադեմիայի սան է։ Հարավռուսական թիմի գլխավոր կազմում կիսապաշտպանը հանդես է գալիս 2018 թվականից և թիմի ավագն է։
Անցած մրցաշրջանում նա բոլոր մրցաշարերում անցկացրել է 42 հանդիպում՝ դառնալով 14 գոլի և 18 գոլային փոխանցման հեղինակ։ Հեղինակավոր Transfermarkt պորտալը ֆուտբոլիստի տրանսֆերային արժեքը գնահատում է 25 միլիոն եվրո։
