Հայտնի մարզական լրագրող և ինսայդեր Ֆաբրիցիո Ռոմանոն X-ի իր էջում հաստատել է Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանի տեղափոխությունը Սաուդյան Արաբիան ներկայացնող «Ալ-Ահլի»։
Նշվում է, որ «Կրասնոդարի», ֆուտբոլիստի ներկայացուցիչների և սաուդյան ակումբի միջև գործարքը վերջնականապես ավարտված է։ Տրանսֆերի արժեքը կկազմի 25 միլիոն դոլար, իսկ ֆուտբոլիստն արդեն բարեհաջող անցել է բուժզննումը։
Ռոմանոն նաև ընդգծում է, որ իտալական «Կոմոն», որի հետաքրքրության մասին ակտիվորեն գրում էր մամուլը, իրականում երբեք բանակցություններ չի վարել հայ կիսապաշտպանի տրանսֆերի շուրջ։
Հիշեցնենք, որ Էդուարդ Սպերցյանը «Կրասնոդարի» ակադեմիայի սան է։
Հարավռուսական թիմի գլխավոր կազմում նա հանդես է գալիս 2018 թվականից՝ կրելով նաև ավագի թևկապը։ Անցած մրցաշրջանում կիսապաշտպանը բոլոր մրցաշարերում անցկացրել է 42 հանդիպում՝ դառնալով 14 գոլի և 18 գոլային փոխանցման հեղինակ։
Հեղինակավոր Transfermarkt պորտալը Սպերցյանի տրանսֆերային արժեքը գնահատում է 25 միլիոն եվրո։
