Ֆրանսիայի հավաքականի ավագ և հարձակվող Կիլիան Մբապեն պատմական նվաճում է գրանցել՝ դառնալով առաջին ֆուտբոլիստը, որը «եռագույնների» կազմում 100 հանդիպման սահմանագիծը հատում է մինչև 30 տարեկանը։
Աշխարհի 2026 թվականի առաջնության խմբային փուլի 2-րդ տուրի՝ Իրաքի դեմ խաղում 27-ամյա հարձակվողը խաղադաշտ է դուրս եկել մեկնարկային կազմում՝ անցկացնելով իր հոբելյանական 100-րդ հանդիպումը ազգային թիմի մարզաշապիկով: Այս մասին հայտնում է X սոցիալական ցանցի Stats Foot էջը։ Նշվում է նաև, որ այս նշագծին հասնելու պահին Մբապեն իր ակտիվում ունի 58 խփած գնդակ հավաքականի կազմում:
Մբապեն դարձավ Ֆրանսիայի ֆուտբոլի պատմության մեջ ընդամենը 10-րդ խաղացողը, որը հատում է 100 խաղի սահմանագիծը։ Նրանից առաջ այսպիսի ցուցանիշ գրանցել են միայն լեգենդար ֆուտբոլիստները՝ Դիդիե Դեշամը (103), Պատրիկ Վիեյրան (107), Զինեդին Զիդանը (108), Մարսել Դեսային (116), Թիերի Անրին (123), Անտուան Գրիզմանը (137), Օլիվյե Ժիրուն (137), Լիլիան Թյուրամը (142) և ռեկորդակիր Ուգո Լյորիսը (145):
Վիճակագրական ևս մեկ հետաքրքիր փաստ. Ֆրանսիայի հավաքականը հաղթել է նախորդ բոլոր 9 հանդիպումներում, երբ թիմի ֆուտբոլիստներից որևէ մեկը նշել է իր 100-րդ խաղը «եռագույնների» կազմում։
Հիշեցնենք, որ ԱՄՆ-ի Ֆիլադելֆիա քաղաքի «Լինքոլն Ֆայնենշել Ֆիլդ» մարզադաշտում ընթացող Ֆրանսիա — Իրաք հանդիպման հաշիվն այս պահին 1:0 է՝ հօգուտ ֆրանսիացիների (խաղը դադարեցված է եղանակային անբարենպաստ պայմանների պատճառով):
