Բրազիլիայի ազգային հավաքականի եզրային հարձակվող Վինիսիուս Ժունիորը, ով ԱԱ-2026-ի խմբային փուլի առաջին տուրի՝ Մարոկկոյի դեմ հանդիպմանը (1:1) դարձել էր գոլի հեղինակ և ճանաչվել խաղի լավագույն ֆուտբոլիստ, կիսվել է իր տպավորություններով։ Մադրիդի «Ռեալի» աստղն անդրադարձել է մեկնարկային խաղի բարդություններին, թիմի տակտիկական փոփոխություններին և իրենց սպասվող հաջորդ փորձությանը։
«Խաղի նախապատրաստությունն ամբողջովին փոխվում է, երբ գոլ ես բաց թողնում հենց մեկնարկում։ Բայց, կարծում եմ, մեզ հաջողվեց արագ ադապտացվել իրավիճակին և բարելավել խաղը պաշտպանությունում։ Ռաֆինյան փոխեց եզրը, ինչի շնորհիվ մենք սկսեցինք ավելի լավ լայնացնել գրոհներն ու շատ վերահսկել գնդակը։
Մրցաշարի մեկնարկային հանդիպումը միշտ շատ բարդ է ստացվում։ Մարոկկոն գերազանց է խաղում, իսկ առաջին խաղի ճնշումը միշտ զգացնել է տալիս հենց այսպես։
Նախորդ աշխարհի առաջնության ժամանակ ես շատ ավելի երիտասարդ էի։ Հիմա ավելի շատ փորձ ունեմ, բայց նաև զգալիորեն մեծացել է պատասխանատվությունը։ Կարծում եմ՝ պատրաստ եմ այն ամենին, ինչ ինձ սպասվում է այս մրցաշարում։ Այստեղ խաղադաշտերն այլ են, եղանակը շատ շոգ է, և մենք պետք է հարմարվենք դրան, քանի որ իրադարձությունները շատ արագ են զարգանում»,- նշել է բրազիլացին:
Խոսելով գլխավոր մարզիչ Կառլո Անչելոտիի ցուցումների մասին՝ Վինիսիուսը մանրամասնել է.
«Միսթերը մեզնից պահանջեց ավելի երկար վերահսկել գնդակը, ավելի հաճախ այն տեղափոխել մի եզրից մյուսը։ Կարծում եմ՝ դա մեզ մոտ ստացվեց, սակայն չկարողացանք շատ գոլային պահեր ստեղծել, քանի որ Մարոկկոյի հավաքականը շատ լավ էր պաշտպանվում։ Սա այնպիսի մրցաշար է, որտեղ պետք է անընդհատ հարմարվել և դառնալ ավելի լավը։
Հիմա մենք պետք է խորապես վերլուծենք այս հանդիպումը: Իհարկե, մեր խաղում կային դրական դրվագներ, բայց մենք պետք է շարունակենք առաջադիմել, քանի որ առջևում արդեն հաջորդ հանդիպումն է։ Եվ մենք պարտավոր ենք ցանկացած գնով հաղթել այդ խաղում»:
Հիշեցնենք, որ C խմբի երկրորդ տուրում Բրազիլիայի հավաքականը հունիսի 20-ին ուժերը կչափի Հայիթիի ընտրանու հետ:
