Իտալիայի ֆուտբոլի ֆեդերացիայի նախագահ Գաբրիելե Գրավինան և ազգային հավաքականի պատվիրակության ղեկավար Ջանլուիջի Բուֆոնը հրաժարական են տվել: Պատճառը ԱԱ-2026-ի որակավորման փուլի փլեյ-օֆֆի եզրափակիչում Բոսնիա և Հերցեգովինայի ընտրանուց կրած ցավալի պարտությունն է (1:1, հիմնական ժամանակում և 1:4՝ 11-մետրանոցներով): Այս ձախողման արդյունքում Իտալիայի հավաքականը բաց կթողնի երրորդ անընդմեջ աշխարհի առաջնությունը:
72-ամյա Գրավինան, ով Իտալիայի ֆուտբոլի ֆեդերացիան ղեկավարում էր 2025 թվականի փետրվարից, իր հեռանալու մասին հայտարարել է Հռոմում կայացած ֆեդերացիայի ստորաբաժանումների ղեկավարների ժողովի ժամանակ: Նախագահի արտահերթ ընտրությունները արդեն նշանակված են հունիսի 22-ին:
Ֆեդերացիայի նախագահի քայլին անմիջապես հետևել է լեգենդար դարպասապահ Ջանլուիջի Բուֆոնը։ X սոցիալական ցանցում արած իր ծավալուն գրառման մեջ նա նշել է, որ հեռանալու որոշումն ինքնաբուխ էր և թելադրված էր այն խորը ցավով, որն ինքը կիսում է ողջ ազգի հետ:
«Երբ նախագահը որոշեց հեռանալ, ես ինձ ազատ զգացի անելու այն, ինչը համարում եմ պատասխանատու քայլ: Չնայած իմ և Ջենարո Գատուզոյի ներդրած ջանքերին՝ մեր գլխավոր նպատակը Իտալիային աշխարհի առաջնություն վերադարձնելն էր, և մենք ձախողվեցինք: Ճիշտ կլինի ազատություն տալ նրանց, ովքեր կգան ինձանից հետո, որպեսզի ընտրեն իրենց համար լավագույն թեկնածուին»,- գրել է Բուֆոնը:
Անդրադառնալով իր կատարած աշխատանքին՝ Բուֆոնը հավելել է, որ պաշտոնավարման կարճ ժամանակահատվածում ամբողջ էներգիան ներդրել է տարբեր տարիքային և գլխավոր հավաքականների միջև սերտ կապ և դիալոգ ստեղծելու համար: Նա հիմք է դրել տաղանդների զարգացման նոր նախագծի՝ հույս հայտնելով, որ գործընթացում ներգրավված բարձրակարգ մասնագետների աշխատանքը միջնաժամկետ և երկարաժամկետ հեռանկարում կտա իր պտուղները՝ ի նպաստ իտալական ֆուտբոլի ապագայի։
«Ես պահում եմ այս ամենն իմ սրտում՝ երախտապարտ լինելով այն արտոնության և դասի համար, որն ինձ տվեց այս փորձառությունը նույնիսկ իր ցավալի վերջաբանով»,- եզրափակել է լեգենդար ֆուտբոլիստը:
