Fastex Հայաստանի Պրեմիեր լիգայի 17-րդ տուրը նշանավորվեց կամային ու չափազանց կարևոր արդյունքով Երևանի «Արարատի» համար։ Արտագնա խաղում հյուրընկալվելով «Վանին»՝ երևանյան թիմին հաջողվեց հաղթանակ կորզել 2։1 հաշվով։
Հանդիպման հիմնական իրադարձություններն ու իրական դրաման ծավալվեցին խաղավերջում։ Գոլալռությունը խախտվեց միայն 77-րդ րոպեին, երբ տանտերերն առաջ անցան հաշվի մեջ: Սեփական տուգանային հրապարակում կոպիտ սխալ թույլ տվեց հյուրերի դարպասապահ Ադել Անզիմատի-Աբուդուն։ Իրավիճակից արագորեն օգտվեց Բենիկ Հովհաննիսյանն ու գնդակը փոխանցեց Մաուրո Նետոյին, ում մնում էր գրավել դատարկ դարպասը։
Այնուամենայնիվ, «Արարատը» ոչ միայն չհանձնվեց, այլև կարողացավ ամբողջությամբ շրջել խաղի ընթացքը։ 85-րդ րոպեին սխալների հերթը «Վանինն» էր. այս անգամ վրիպեց Արսեն Գալստյանը, ինչի արդյունքում Պրինց Օբինան տիրեց գնդակին և այն հասցեագրեց Մամադու Դումբիային՝ վերականգնելով հաշվի հավասարությունը:
Իսկ հանդիպման կուլմինացիան գրանցվեց մրցավարի կողմից հիմնական ժամանակին ավելացված 7-րդ րոպեին։ «Արարատը» վաստակեց 11-մետրանոցի իրավունք։ Գնդակին մոտեցած Դումբիան անվրեպ գտնվեց՝ դառնալով դուբլի հեղինակ ու իր թիմին պարգևելով ընթացիկ առաջնության անդրանիկ հաղթանակը։
Տեսանյութը՝ այստեղ
ՀՊԼ-ի մրցաշարային աղյուսակն այս պահին
