Իտալիայի Գավաթի խաղարկության կիսաեզրափակիչ փուլի առաջին հանդիպումը «Կոմոյի» և Միլանի «Ինտերի» միջև ավարտվեց գոլազուրկ ոչ-ոքիով:
Կոմոյի «Ջուզեպե Սինիգալիա» մարզադաշտում կայացած լարված դիմակայությունում թիմերն այդպես էլ չկարողացան գտնել միմյանց դարպասի բանալին՝ եզրափակչի ուղեգրի հարցի լուծումը թողնելով պատասխան խաղին:
Հանդիպման 85-րդ րոպեին խաղադաշտ դուրս եկավ «ներաձուրիների» կիսապաշտպան Հենրիխ Մխիթարյանը։
Հիշեցնենք, որ քառորդ եզրափակչում «Կոմոն» անկոտրում կամք էր դրսևորել և հետխաղյա 11-մետրանոցներով պայքարից դուրս թողել «Նապոլիին» (հիմնական ժամանակը՝ 1:1), իսկ «Ինտերը» 2:1 հաշվով դժվարին հաղթանակ էր կորզել «Տորինոյի» դեմ խաղում:
Թիմերի միջև պատասխան հանդիպումը կկայանա ապրիլի 22-ին՝ Միլանում:
Կիսաեզրափակիչ մյուս զույգը կազմել են «Լացիոն» ու «Ատալանտան», որոնց առաջին դիմակայությունը կկայանա այսօր՝ մարտի 4-ին:
Հավելենք, որ մրցաշարի եզրափակիչը նախատեսված է մայիսի 13-ին Հռոմում: Իտալիայի Գավաթի գործող հաղթողը «Բոլոնիան» է, որը նախորդ տարվա վճռորոշ խաղում 1:0 հաշվով ուժեղ էր գտնվել «Միլանից»:
