Բրազիլական ֆուտբոլի լեգենդ, 42-ամյա Դանի Ալվեսը մոտ ժամանակներս կարող է վերադառնալ պրոֆեսիոնալ ֆուտբոլ։ Ըստ The Touchline-ի տեղեկությունների՝ պաշտպանը դիտարկում է Պորտուգալիայի երրորդ դիվիզիոնը ներկայացնող «Սան Ժոաու դե Վեր» ակումբում հանդես գալու տարբերակը։
Վերջերս Ալվեսը դարձել է նշված պորտուգալական ակումբի համասեփականատերը։ Այժմ նա զբաղված է խաղադաշտ վերադառնալու համար անհրաժեշտ փաստաթղթերի ձևակերպմամբ։
Աղբյուրը ընդգծում է, որ չնայած տարիքին՝ Դանին չի հրաժարվել իր մեծ երազանքից՝ Բրազիլիայի հավաքականի կազմում մասնակցելու աշխարհի 2026 թվականի առաջնությանը։ Թեպետ փորձագետները թերահավատորեն են մոտենում մունդիալին նրա մասնակցության հավանականությանը, ֆուտբոլիստը վճռական է տրամադրված։
Հիշեցնենք, որ անցած գարնանը Դանի Ալվեսն արդարացվել էր բռնաբարության մեղադրանքով հարուցված աղմկահարույց գործի շրջանակում։ Մինչ այդ բրազիլացին ավելի քան մեկ տարի անցկացրել էր անազատության մեջ։
