Ո՞վ ում «գցեց ավտոբուսի տակ». Սլոտը բացում է փակագծերը Սալահի հետ կոնֆլիկտում

«Լիվերպուլի» գլխավոր մարզիչ Առնե Սլոտը Չեմպիոնների լիգայի շրջանակում «Ինտերի» դեմ արտագնա խաղից առաջ պատասխանել է լրագրողների հարցերին։ Մամուլի ասուլիսի հիմնական թեման Մոհամեդ Սալահի բացակայությունն էր և նրա վերջին աղմկահարույց հայտարարությունները։

Սլոտը հաստատել է, որ եգիպտոսցի հարձակվողը չի մեկնել Միլան և չի մասնակցի հանդիպմանը։

«Մենք նրան տեղեկացրել ենք, որ նա չի մեկնում մեզ հետ: Դա եղել է մեր միակ հաղորդակցությունը։ Իհարկե, մինչև շաբաթ օրը մենք շատ ենք խոսել, բայց «Լիդսի» դեմ խաղից հետո մեր շփումը սահմանափակվել է միայն դրանով»,- նշել է մարզիչը։

Անդրադառնալով Սալահի՝ «հարվածի տակ դնելու» (thrown under the bus) մասին մեկնաբանությանը, Սլոտն ասել է. «Միակ մարդը, ով կարող է պատասխանել այդ հարցին, հենց Մոն է։ Ես կարող եմ ենթադրություններ անել, բայց չեմ կարծում, որ այս պահին դա ճիշտ կլինի։ Անկեղծ ասած, դժվար է ասել, թե ում նկատի ուներ նա»։

Մարզիչը չի կարծում, որ իր և ֆուտբոլիստի հարաբերությունները վերջնականապես խզվել են, սակայն ընդգծել է թիմային կարգապահության կարևորությունը.

«Նա իրավունք ունի զգալ այն, ինչ զգում է։ Ես նախկինում նման բան չեմ զգացել, քանի որ նա միշտ հարգալից է եղել իմ անձնակազմի և թիմակիցների նկատմամբ և շատ ջանասիրաբար է մարզվել։ Ուստի, ինձ համար անակնկալ էր լսել նրա մեկնաբանությունները խաղից հետո։ Նա կարող է ունենալ իր կարծիքը, բայց իրավունք չունի դա կիսել մամուլի հետ… Ճիշտ է, նա ունի խոսելու իրավունք, բայց մեր խնդիրն էլ դրան արձագանքելն է, և մեր արձագանքը հստակ է․ նա այսօր մեզ հետ չէ»։

Հարցին, թե արդյոք Սալահը խաղացել է իր վերջին խաղը «Լիվերպուլի» կազմում, Սլոտը պատասխանել է.

«Գաղափար չունեմ, այս պահին չեմ կարող պատասխանել այդ հարցին»:

Սլոտը բացատրել է, որ Սալահին պահեստայինների նստարանին թողնելը պայմանավորված էր տակտիկական նկատառումներով և թիմի վերջին անհաջողություններով։

«Մենք խնդիրներ ունեինք մրցակիցների խաղային պլանների դեմ, հատկապես երբ նրանք օգտագործում էին երկար փոխանցումներ։ Ես փորձել եմ լուծումներ գտնել։ «Լիդսի» դեմ որոշեցի խաղալ 4-4-2 «շեղանկյուն» սխեմայով՝ աջից Ուգո Էկիտիկեի, իսկ ձախից՝ Կոդի Գակպոյի մասնակցությամբ, կենտրոնում՝ Ֆլորիան Վիրցն էր։ Ես կարող էի աջ եզրում խաղացնել Մոյին, բայց ընտրեցի Ուգոյին»։

Խոսելով առաջիկա մրցակցի մասին՝ Սլոտը գովեստով է արտահայտվել «Ինտերի» և նրանց գլխավոր մարզիչ Կրիստիան Կիվուի հասցեին.

«Մենք դիմակայելու ենք շատ ուժեղ թիմի։ Նրանք վերջին երեք մրցաշրջաններում մեծ ուժ են ներկայացրել Չեմպիոնների լիգայում։ Կիվուի գլխավորությամբ թիմը պահպանել է նախկին խաղաոճը՝ ագրեսիվ պրեսինգ և պաշտպանությունում հստակ գործողություններ։ Կիվուն հիանալի պաշտպան էր, ով լավ էր խաղում գնդակով, և այդ հատկանիշները տեսանելի են նաև նրա գլխավորած թիմում»։

Անդրադառնալով Ֆեդերիկո Կիեզային և Իտալիայի հավաքականում նրա բացակայությանը, Սլոտը նշել է.

«Ես ուրախ եմ տեսնել, որ Ֆեդերիկոն ֆիզիկապես շատ ավելի լավ վիճակում է, քան անցյալ մրցաշրջանում։ Իտալիայի հավաքականի մարզչի որոշելիքն է՝ հրավիրել նրան, թե ոչ, բայց ինձ դուր է գալիս նա և՛ որպես ֆուտբոլիստ, և՛ որպես անձնավորություն»։