Ֆուտբոլի միջազգային ֆեդերացիան (ՖԻՖԱ) որոշել է փոխել Եվրոպայի գործող չեմպիոն Իսպանիայի և Ամերիկայի գործող գավաթակիր Արգենտինայի հավաքականների միջև Ֆինալիսիմայի հանդիպման օրը։ Այս մասին հայտնում է իսպանական Marca-ն։
Աղբյուրի տեղեկություններով՝ սկզբնապես նախատեսված ամսաթվի՝ մարտի 28-ի փոխարեն, հավաքականների միջև խաղը կկայանա 2026 թվականի մարտի 27-ին։
Աղբյուրի համաձայն՝ հանդիպումը նախատեսված է անցկացնել Կատարի «Լուսաիլ» մարզադաշտում։ ՖԻՖԱ-ն ցանկանում է կազմակերպել խաղը այնպես, որ այն նման լինի «մեծ եզրափակչի»։
Սակայն ընդգծվում է, որ ամեն ինչ կախված կլինի Իսպանիայի հավաքականի՝ 2026 թվականի աշխարհի առաջնության ուղիղ որակավորումից։ Եթե «Ֆուրիա Ռոխան» մասնակցի աշխարհի առաջնության որակավորման փլեյ-օֆֆ փուլին, որը կկայանա մարտին, ապա եզրափակիչը տեղի չի ունենա։
Ավելի վաղ հաղորդվել էր, որ 2025 թվականի ազգային հավաքականների միջազգային օրացույցում Ֆինալիսիմայի համար տեղ չի գտնվել, ինչի պատճառով մրցաշարը տեղափոխվել է 2026 թվական։
Սա կլինի Ֆինալիսիմայի պատմության չորրորդ խաղարկությունը։ Նախորդ անգամ տիտղոսը նվաճեց Արգենտինայի հավաքականը, որը 2022 թվականին Լոնդոնում կայացած վճռորոշ խաղում 3:0 հաշվով հաղթեց Եվրոպայի գործող չեմպիոն Իտալիային։ Այդ խաղում գոլերի հեղինակ դարձան Լաուտարո Մարտինեսը, Անխել Դի Մարիան և Պաուլո Դիբալան։
