«Վիլյառեալի» ղեկավարությունը ծայրաստիճան դժգոհ է Լա Լիգայի գործողություններից՝ ԱՄՆ-ում «Բարսելոնայի» դեմ նախատեսված խաղը չեղարկելու կապակցությամբ, հայտնում է COPE-ն։
Լա Լիգան հրաժարվեց Իսպանիայի առաջնության 17-րդ տուրի՝ «Վիլյառեալ»-«Բարսելոնա» հանդիպումը Մայամի տեղափոխելու մտքից, քանի որ Իսպանիայի Ֆուտբոլիստների Ասոցիացիան (AFE) կազմակերպել էր լայնամասշտաբ բողոքի ակցիաներ։ Ֆուտբոլիստների ընդդիմության պատճառով լիգան որոշեց խաղը թողնել սովորական ռեժիմով՝ «Վիլյառեալի» մարզադաշտում։
Աղբյուրի տվյալներով՝ «Դեղին սուզանավի» ղեկավարները վրդովված են այն փաստից, որ Լա Լիգայի ղեկավարությունն ի վիճակի չեղավ կառավարել իրավիճակը։ Ակումբում կարծում են, որ լիգան «ցուցաբերել է անհեռատեսություն և անկարողություն՝ կարգավորելու ֆուտբոլիստների հետ ծագած խնդիրը»։
Չնայած այն հանգամանքին, որ Իսպանիայի Թագավորական ֆուտբոլային ֆեդերացիան (RFEF) նախապես հավանություն էր տվել խաղը Մայամի տեղափոխելուն, AFE-ի կազմակերպած բողոքը (որի շրջանակում ֆուտբոլիստները մեկնարկային սուլիչից հետո անշարժ կանգնած էին դաշտում) ստիպեց Լա Լիգային հետ քայլ անել։
«Վիլյառեալը» մտադիր էր խաղից մեծ եկամուտներ ստանալ, սակայն նախագիծը ձախողվեց։
