Հունգարիայի առաջատար սպորտային օրաթերթը՝ Nemzeti Sport-ը, հինգշաբթի օրվա համարի շապիկին ներկայացրել է Հայաստանի ֆուտբոլի ազգային հավաքականի հարձակվող Տիգրան Բարսեղյանին։
32-ամյա խաղացողը հարցազրույց է տվել օրաթերթին՝ խոսելով 2026 թվականի աշխարհի առաջնության որակավորման փուլի Հունգարիա — Հայաստան հանդիպման մասին։
Ահա օրաթերթի հոդվածի մի հատված.
«Շաբաթ օրը Հունգարիայի ֆուտբոլի ազգային հավաքականն Աշխարհի առաջնության որակավորման փուլի շրջանակում «Պուշկաշ Արենայում» կհյուրընկալի Հայաստանի հավաքականին։ Հանդիպումից առաջ մեր թերթին հարցազրույց է տվել Հայաստանի հավաքականի ավագ, Բրատիսլավայի «Սլովանի» լեգեոներ Տիգրան Բարսեղյանը։ Երկու տուրից հետո Հայաստանը զբաղեցնում է երկրորդ հորիզոնականը՝ ապահովելով փլեյ-օֆֆի ուղեգիր ստանալու հնարավորություն։
Սակայն, Բարսեղյանի խոսքով, «ներկայիս մրցաշարային աղյուսակը գրեթե ոչինչ չի նշանակում։ Շաբաթ օրվա խաղում ֆավորիտը Հունգարիան է. նրա կազմում հանդես են գալիս բարձրակարգ եվրոպական ակումբներ ներկայացնող հիանալի ֆուտբոլիստներ, իսկ խաղին կհաջորդի մոտ վաթսուն հազար երկրպագու։ Հունգարիան մասնակցել է վերջին երեք Եվրոպայի առաջնություններին, մինչդեռ մենք միայն երազում ենք խոշոր մրցաշարերում հանդես գալու մասին։ Այնուամենայնիվ, մի բան հստակ է՝ մենք դաշտ դուրս կգանք առանց հանձնվելու»։
