Պրեմիեր լիգայի 6-րդ տուրի «Նյուքասլ» – «Արսենալ» հանդիպումը բարդ էր գլխավոր մրցավար Ջարեդ Ջիլեթի համար։ Խաղում բազմաթիվ վիճահարույց դրվագներ եղան, սակայն նա կարողացավ գլուխ հանել իրավիճակներից։
VAR-ի օգնությամբ մրցավարը վերլուծեց Յոկերեշի անկման դրվագը և 11-մետրանոց չնշանակեց, քանի որ Փոուփը հասցրել էր գնդակին խաղալ ոտքով։ Հանդիպման վերջում Ջիլեթը կրկին դիմեց տեսակրկնություններին։
Էլանգան փորձեց փոխանցում կատարել տուգանային հրապարակի կենտրոն, սակայն Գաբրիելը սահընկում կատարեց։ Գնդակը դիպավ պաշտպանի ոտքին, ապա անդրադարձավ նրա մեկնած ձեռքին։ «Նյուքասլի» խաղացողները պահանջում էին 11-մետրանոց, սակայն VAR-ի դիտարկումից հետո մրցավարը որոշեց, որ խախտում չկա։ Ըստ կանոնների, եթե գնդակը դիպչում է ձեռքին անմիջապես խաղացողի գլխից, մարմնից կամ ոտքից անդրադարձվելուց հետո, դա խախտում չի համարվում։
Հենց Գաբրիելն էլ հետո խփեց հաղթական գոլը «Արսենալի» համար՝ ապահովելով 2:1 հաշվով հաղթանակ։ Ինչպես սովորություն է դարձել «զինագործների» համար, գոլը խփվեց անկյունայինի խաղարկումից հետո։
