Աշխարհի 2026թ․ առաջնության եվրոպական գոտու որակավորման փուլի մեկնարկային տուրում Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում ուժերը կչափի Պորտուգալիայի ընտրանու հետ։
Նախախաղային մամուլի ասուլիսի ժամանակ Պորտուգալիայի ընտրանու պաշտպան Ռուբեն Դիաշը պատասխանեց լրագրողների հարցերին։
— Պատրա՞ստ եք այստեղ բարդություններին։
— Այո, մենք արդեն ուսումնասիրել ենք նրանց խաղը և լիովին գիտակցում ենք, որ եթե չխաղանք բարձր մակարդակով, դժվարություններ կունենանք։ Սա մրցակցային և վտանգավոր թիմ է։
— Որո՞նք են մրցակցի ուժեղ կողմերը։
— Հայաստանի հավաքականը ուժեղ է հակագրոհներում և լավ կազմակերպված է պաշտպանությունում։ Նոր մարզիչը որոշակի անորոշություն է ստեղծում, բայց այս մակարդակում դժվարություններ կարող են առաջանալ միայն այն դեպքում, եթե անուշադիր լինենք կամ չցուցադրենք մեր լավագույն խաղը։
— Կենտրոնացած եք վաղվա՞ խաղի վրա։
— Այս ընտրական փուլում հաջողության գրավականը խաղ առ խաղ մտածելն է։ Այս պահին մենք կենտրոնացած ենք միայն վաղվա խաղի վրա, և դա մեզ համար շատ հստակ է։
— Գերմանիայի նկատմամբ հաղթանակը զգուշացո՞ւմ էր մյուսների համար։
— Կասեի՝ ավելի շատ վստահություն էր։ Պատասխանատվությունն արդեն կրում ենք՝ հաշվի առնելով մեր խաղացողների որակը և այն երկրի անունը, որն այդքան մեծ նշանակություն ունի ֆուտբոլային աշխարհում։ Այդ հաղթանակը կառուցված էր մեր գաղափարների և նախկինում փորձված, բայց ձախողված փորձերի վրա։ Այն մեզ համար վստահության կարևոր գործոն դարձավ։
— Ի՞նչ կասեք մրցակցի մասին։
— Մենք տեսագրություններով ուսումնասիրել ենք Հայաստանի հավաքականը։ Սա վտանգավոր թիմ է՝ լավ կազմակերպված պաշտպանությամբ և վտանգավոր հակագրոհներով։ Վերջերս նրանք մարզիչ են փոխել, ինչը որոշակի հարցականներ է առաջացնում, թե ինչ կարող են ցույց տալ։ Պորտուգալիան պետք է խաղա բարձր մակարդակով՝ նրանց հաղթելու համար։
— Պորտուգալիան ֆուտբոլի գերտերություն է, բայց Հայաստանում էլ ֆուտբոլը զարգանում է…
— Անկեղծ ասած, այդ մասին շատ բան չեմ կարող ասել։ Իմ ուշադրությունը կենտրոնացած է բացառապես Պորտուգալիայի հավաքականի վրա։
— «Բրայթոնի» դեմ խաղում դուք ընդամենը 6 րոպե խաղացիք։ Ինչպե՞ս է Ձեր ֆիզիկական վիճակը հավաքականում խաղը սկսելու համար։
— Ես այստեղ եմ՝ խոսելու Պորտուգալիայի հավաքականի մասին։
— Կապի մե՞ջ եք Հայաստանում խաղացող պորտուգալացի ֆուտբոլիստների հետ։
— Էլդեր Ֆերեյրան գալու է խաղին, հատկապես որ ես նրա համար տոմսեր եմ գտել (ծիծաղում է)։ Մենք շարունակում ենք կապ պահպանել դեռ նախկին ժամանակներից և լավ հարաբերություններ ունենք։
— Հայաստան – Պորտուգալիա խաղի 21-րդ րոպեին նախատեսված է մեկ րոպե ծափահարություն՝ ի հիշատակ Դիոգու Ժոտայի…
— Այդ մասին լսելով՝ նույնիսկ մարմինս սարսռաց։ Պորտուգալիայի անունից սրտանց շնորհակալություն եմ հայտնում այդ ժեստի համար։ Շատ մեծ շնորհակալություն։
Հիշեցնենք, որ Հայաստան-Պորտուգալիա հանդիպումը կկայանա սեպտեմբերի 6-ին։
