Խոսեպ Գվարդիոլան հայտնել է, որ դադար կվերցնի մարզչական կարիերայում՝ «Մանչեսթեր Սիթիի» գլխավոր մարզչի պաշտոնից հեռանալուց հետո։ 54-ամյա իսպանացու պայմանագիրը ակումբի հետ գործում է մինչև 2026/27 մրցաշրջանի ավարտը։
«Ես գիտեմ, որ «Մանչեսթեր Սիթիում» իմ աշխատանքն ավարտելուց հետո հաստատ դադար եմ վերցնելու։ Դա արդեն որոշված է։ Չգիտեմ՝ որքան կտևի այդ դադարը՝ մեկ, երկու, երեք, հինգ, տասը, թե տասնհինգ տարի։ Բայց այս փուլի ավարտից հետո ես կանգ կառնեմ, քանի որ պետք է կենտրոնանամ իմ անձի և մարմնի վրա», — ասել է Գվարդիոլան GQ España ամսագրին տված հարցազրույցում։
2024 թվականի նոյեմբերին «Մանչեսթեր Սիթին» երկարաձգել է Գվարդիոլայի պայմանագիրը մինչև 2026/27 մրցաշրջանի ավարտը։ 2025 թվականի մայիսին նա ESPN-ին հայտնել էր, որ կհեռանա ակումբից պայմանագրի ավարտին։
Գվարդիոլան, ով 54 տարեկան է, «Մանչեսթեր Սիթիի» գլխավոր մարզիչ է 2016 թվականից։ Նրա ղեկավարությամբ թիմը 2022/23 մրցաշրջանում առաջին անգամ նվաճեց տրեբլ՝ հաղթելով Չեմպիոնների լիգան, Անգլիայի Պրեմիեր լիգան (ԱՊԼ) և Անգլիայի գավաթը։ Նույն մրցաշրջանում «Սիթին» առաջին անգամ դարձավ Աշխարհի ակումբային առաջնության հաղթող և նվաճեց ՈւԵՖԱ-ի Սուպերգավաթը։ Ընդհանուր առմամբ, Գվարդիոլայի ղեկավարությամբ «Մանչեսթեր Սիթին» նվաճել է 18 տիտղոս, այդ թվում՝ վեց Պրեմիեր լիգայի չեմպիոնություն։
Իր մարզչական կարիերայի ընթացքում Գվարդիոլան աշխատել է նաև «Բարսելոնայում» և «Բավարիայում»։ «Բարսելոնայի» հետ նա երեք անգամ հաղթել է Իսպանիայի առաջնությունն ու Սուպերգավաթը, երկու անգամ՝ գավաթը, ինչպես նաև երկուական անգամ նվաճել է ՈւԵՖԱ-ի Չեմպիոնների լիգան, ՈւԵՖԱ-ի Սուպերգավաթը և Աշխարհի ակումբային առաջնությունը։ «Բավարիայի» հետ նա երեք անգամ դարձել է Գերմանիայի չեմպիոն, երկու անգամ՝ գավաթակիր և սուպերգավաթակիր, ինչպես նաև հաղթել է Աշխարհի ակումբային առաջնությունում։
2024/25 մրցաշրջանում «Մանչեսթեր Սիթին» վաստակել է 71 միավոր և զբաղեցրել երրորդ տեղը Անգլիայի Պրեմիեր լիգայի մրցաշարային աղյուսակում։ Չեմպիոն է դարձել «Լիվերպուլը»՝ 84 միավորով, երկրորդ տեղում «Արսենալն» է՝ 74 միավորով։ «Սիթին» Գվարդիոլայի ղեկավարությամբ առաջին անգամ ավարտել է մրցաշրջանը՝ առանց որևէ տիտղոս նվաճելու։ Նոր մրցաշրջանում «Մանչեսթեր Սիթին» ԱՊԼ-ն կսկսի օգոստոսի 16-ին՝ արտագնա խաղով «Վուլվերհեմփթոնի» դեմ։
