Անգլիացի հարձակվող Մարկուս Ռեշֆորդը շուտով կդառնա «Բարսելոնայի» նոր խաղացող։ Նա Կատալոնիա է ժամանել կիրակի երեկոյան՝ «Մանչեսթեր Յունայթեդի» և «Բարսելոնայի» միջև վարձակալության պայմանավորվածությունից հետո։ Ռեշֆորդն արդեն անցել է բուժզննում և հանդիպել մարզիչ Հանսի Ֆլիկի ու մարզական տնօրեն Դեկուի հետ։ Այս մասին գրում է Sport.es-ը։
Ռեշֆորդը նոր թիմի հետ առաջին մարզումը կանցկացնի երեքշաբթի՝ մասնակցելով Ֆլիկի ծրագրած կրկնակի մարզումային օրվան։ Չորեքշաբթի նա պաշտոնապես կներկայացվի որպես «Բարսելոնայի» խաղացող։ Նա պայմանագիր կկնքի ակումբի գրասենյակում և կլուսանկարվի նախագահ Ժոան Լապորտայի ու ակումբի ղեկավարության հետ։
Ներկայացման արարողությունը կկայանա չորեքշաբթի երեկոյան՝ կա՛մ Barça Botiga-ում, կա՛մ Auditori 1899-ում։ Արարողությունից հետո Ռեշֆորդը կպատասխանի լրագրողների հարցերին։ Հինգշաբթի թիմը կմեկնի Ճապոնիա՝ նախամրցաշրջանային շրջագայության։
Ռեշֆորդը «Բարսելոնա» է տեղափոխվել վարձակալությամբ՝ հետագայում 30 միլիոն եվրոյով գնելու իրավունքով։ Ֆուտբոլիստը համաձայնել է 15%-ով նվազեցված աշխատավարձ ստանալ՝ մոտ 14 միլիոն եվրո (մուտքագրով) մեկ մրցաշրջանի համար։ «Բարսելոնան» սկզբում վարձավճար չի վճարի, սակայն եթե չօգտագործի գնման իրավունքը, պարտավորվում է որոշակի գումար վճարել «Մանչեսթեր Յունայթեդին»։
