Մադրիդի «Ռեալը» այսօր Չեմպիոնների լիգայի խմբային փուլի երրորդ տուրի շրջանակում հյուրընկալվելու է «Գալաթասարային»։ Համաձայնվեք՝ հեշտ հանդիպում չէ սխալների ուղղման համար։
Ինչևէ, Զիդանն ու իր թիմը այլ տարբերակ չունեն։ Այսօր հաղթել է պետք։ Ինչպես երեկ մամուլի ասուլիսի ժամանակ նշեց Զիզուն․ «Մենք վատ ենք մեկնարկել ՉԼ-ում ու վաղը ունենք հնարավորություն այդ ամենը շտկելու համար»։
Ի՞նչ կազմ կընտրի Զիդանը
Դարպասում դարձյալ կլինի Տիբո Կուրտուան։ Զիդանը «Գալաթասարայի» դեմ խաղում արկածախնդրային որոշում, կարծում եմ, չի կայացնի։ Կխաղա բելգիացի կիպերը։
Պաշտպանությունում կլինի Զիդանի սիրելի քառյակը։ Մարսելո-Ռամոս-Վարան-Կարվախալ։ Վերջինս հանգստացել է Լա լիգայի նախորդ խաղում։ Կիսապաշտպանությունում Կրոս-Կազեմիրո-Վալվերդե տարբերակը ամենաօպտիմալն է թվում։ Եթե Կրոսը ի վիճակի լինի խաղալու գոնե 60 րոպե, ապա կսկսի մեկնարկից։
Հարձակման գծում կխաղան Ազարը, Բենզեման և Ռոդրիգոն։ Բրազիլացի վունդերկինդը վերջին խաղում ևս ապացուցեց, որ ավելի օգտակար կարող է լինել, քան Վինիսիսուսը։
Արամ Սահակյան