Մադրիդի «Ռեալը», ամենայն հավանականությամբ, կձգտի ձեռք բերել ՊՍԺ-ի 24-ամյա հարձակվող Կիլիան Մբապեին ոչ թե այս, այլ հաջորդ ամառ, հայտնում է Football Espana-ն:
Աղբյուրի համաձայն՝ սերուցքայինների ղեկավարության դիրքորոշումը չի փոխվել՝ նրանք նախատեսում են սպասել հաջորդ ամառ՝ ազատ գործակալի կարգավիճակով Ֆրանսիայի հավաքականի հարձակվողին ստորագրելու համար։ Չնայած այն վերջնագրին, որը փարիզյան ակումբը ներկայացրել է Մբապեին, Մադրիդի «Ռեալը» հանգիստ է վերաբերվում խաղացողի շուրջ ստեղծված իրավիճակին։ Իր հերթին ՊՍԺ-ն կփորձի համոզել Կիլիանին նոր պայմանագիր կնքել։ Ձախողման դեպքում փարիզցիները կսկսեն քննարկել խաղացողի տրանսֆերային արժեքը և ծրագրում են ակտիվորեն զբաղվել նրա վաճառքով արդեն այս օգոստոսին։
Կիլիան Մբապեն փարիզցի ֆուտբոլիստ է դարձել 2017 թվականի ամռանը՝ «Մոնակոյից» տեղափոխվելով ՊՍԺ։ Նախորդ մրցաշրջանում հարձակվողը 43 խաղում դարձել է 41 գոլի և 10 գոլային փոխանցման հեղինակ։ ՊՍԺ-ի հետ Մբապեն հինգ անգամ հաղթել է Ֆրանսիայի առաջնությունում, երեք անգամ՝ Ֆրանսիայի գավաթում։