Սերխիո Բուսկետսը մեկնաբանել է ամռանը «Բարսելոնայից» հեռանալու իր որոշումը։ Այսօր 34-ամյա կիսապաշտպանը պաշտոնապես հայտարարել է, որ մրցաշրջանի ավարտից հետո հեռանալու է կատալոնական ակումբից։
«Բարև, երկրպագուներ: Ժամանակն է հայտարարել, որ այս մրցաշրջանն ինձ համար վերջինն է «Բարսելոնայում»:
Սա անմոռանալի ճամփորդություն է եղել մանկուց, երբ գալիս էի հանդիպումներին կամ դիտում էի այն հեռուստացույցով։ Ես միշտ երազել եմ խաղալ այս մարզաշապիկով և այս մարզադաշտում։ Իրականությունը գերազանցեց իմ բոլոր սպասելիքները։
Ես չէի հավատա, եթե ինձ ասեին, երբ երիտասարդ տարիքում հայտնվեցի «Բարսայի» համակարգ, որ ես 15 մրցաշրջան կանցկացնեմ աշխարհի լավագույն ակումբում՝ իմ կյանքի ակումբում, որ կլինեմ այս թիմի խաղացող և ավագ, կանցկացնեմ ավելի քան 700 հանդիպում։
Ինձ համար պատիվ և հպարտություն է եղել, որ կարողացել եմ երկար տարիներ կրել, ներկայացնել և պաշտպանել «Բարսելոնայի» տարբերանշանը, բայց ամեն ինչ ունի սկիզբ և վերջ։ Չնայած որոշումը հեշտ չէր, բայց կարծում եմ, որ ժամանակը եկել է։
Ես ուզում եմ շնորհակալություն հայտնել բոլոր այն մարդկանց, ովքեր օգնեցին դա իրականություն դարձնել՝ առաջին օրվանից մինչև վերջին՝ ակումբի անձնակազմին, բժիշկներին, ֆիզիոթերապևտներին, հանդերձանքի մենեջերներին, ադմինիստրատորներին, պատվիրակներին, մամուլին, ղեկավարությանը, նախագահներին, մարզիչներին, վերլուծաբաններին: Եվ հատկապես իմ գործընկերներին, որոնց հետ հազարավոր ժամեր էի կատակում, զրուցում, խաղում, ծիծաղում, լաց էի լինում, տոնում:
Նաև շնորհակալ եմ ամբողջ աշխարհի երկրպագուներին, ովքեր աջակցեցին ինձ և սեր տվեցին ինձ այս ամբողջ ընթացքում։ Եվ, իհարկե, շնորհակալություն ընտանիքիս, ով աջակցեց ինձ լավ և վատ ժամանակներում, այս ուղևորությունը դարձրեց առանձնահատուկ և շատ բաներ զոհաբերեց իմ կողքին լինելու և ինձ երջանիկ դարձնելու համար:
Շնորհակալություն բոլորիդ, շուտով կտեսնվենք վերջին հանդիպումներում: «Բարսելոնայի» երկրպագու լինելը լավագույնն է, որ կարող ես լինել»,- ասել է Բուսկետսը, ում խոսքերն է մեջբերում ակումբի մամուլի ծառայությունը։
