Մարտի 25-ին ֆուտբոլի Հայաստանի ազգային հավաքականը Եվրո-2024-ի ընտրական փուլում կընդունի Թուրքիայի հավաքականին: Որակավորման փուլի Հայաստանի հավաքականի մրցակիցները հայտնի դարձան դեռևս նախորդ տարվա հոկտեմբերին: Ավելորդ է նշել, թե ինչ ոգևորություն առաջացավ հայ երկրպագուների շրջանում, երբ վիճակահանությամբ Հայաստանի հետ նույն խմբում հայտնվեց նաև Թուրքիան: Բնականաբար, սպասելի էր, որ խաղին Հանրապետական մարզադաշտի տրիբունաները կլինեն լեփ-լեցուն: Երկրպագուները, սակայն, չէին սպասում, որ իրենց տհաճ անակնկալ կմատուցվի:
Մարտի 6-ին ՀՖՖ-ն պաշտոնական կայքում հայտնեց, որ մեկնարկում է Հայաստան-Թուրքիա հանդիպման տոմսերի առցանց վաճառքը:
«Տոմսերի վաճառքը Վ. Սարգսյանի անվան «Հանրապետական» մարզադաշտի տոմսարկղում կմեկնարկի ավելի ուշ: Այդ մասին կտրամադրվի հավելյալ տեղեկատվություն»,-ասված էր ՀՖՖ պաշտոնական կայքում:
Մինչ երկրպագուների մի ստվար զանգված սպասում էր տոմսարկղից տոմսերի վաճառքի մեկնարկին, մարտի 13-ին ՀՖՖ-ն հայտնում է, որ հանդիպման բոլոր տոմսերը սպառված են և շնորհակալություն հայտնում երկրպագուներին ցուցաբերած ակտիվության համար:
Հայտարարությունից հետո համացանցում բազմաթիվ երկրպագուներ հայտնում են իրենց դժգոհությունը՝ կապված խաղի տոմսերի՝ տոմսարկղից վաճառքի վերաբերյալ: Բազմաթիվ ֆուտբոլասերներ սպասել են տոմսարկղից՝ հանդիպման տոմսերի վաճառքին, սակայն, ինչպես հայտնի է դառնում, ՀՖՖ հայտարարությունից մեկ շաբաթ անց հանդիպման բոլոր տոմսերը վաճառվել են առցանց, այնինչ նախապես հայտարարվել էր, որ վաճառք կլինի նաև տոմսարկղում: Ինչ խոսք, միայն ուրախալի է, որ խաղի նկատմամբ հետաքրքրությունն այնքան մեծ է, որ մեկ շաբաթում սպառվել է գրեթե 15 հազար տոմս, սակայն փաստ է, որ ՀՖՖ-ն խաղին ընդառաջ հիասթափեցրեց շատ երկրպագուների: Հուսանք, որ այս հիասթափությունը կմնա խաղադաշտից դուրս, և Հայաստանի ընտրանին իր խաղով կուրախացնի նաև այն երկրպագուներին, ովքեր սպասեցին ՀՖՖ-ի խոստացած տոմսերի վաճառքին: