Եվրոպա լիգայի որակավորման փլեյ-օֆֆ փուլի առաջին խաղում «Փյունիկը» կհյուրընկալի Մոլդովան ներկայացնող «Շերիֆին»։ Երևանյան ակումբի մամուլի ծառայությունը ներկայացրել է առաջիկա մրցակցին։
«Մեր թիմի մրցակիցն է Մոլդովայի չեմպիոն Տիրասպոլի «Շերիֆը», որը քաջ հայտնի է հայ ֆուտբոլասերներին, քանի որ նախկինում մի քանի անգամ արդեն հանդիպել է հայկական թիմերի հետ եվրոգավաթների խաղարկություններում։
Նշենք, որ սա կլինի «Փյունիկի» և «Շերիֆի» միջև երկրորդ դիմակայությունը եվրոգավաթներում։ Թիմերն առաջին անգամ միմյանց հետ հանդիպել են Չեմպիոնների Լիգայի 2006/07թթ․ խաղարկության որակավորման առաջին փուլում, որտեղ երկու հանդիպումների արդյունքով (0:0, 2:0) հաջողությունն ուղեկցել էր մոլդովական ակումբին։
Պատմությունը
Ակումբը ստեղծվել է 1997թ.-ին եվ ներկայացնում է Տիրասպոլ քաղաքը։ «Շերիֆը» Մոլդովայի ամենատիտղոսակիր թիմն է և վերջին 7 տարիների երկրի անփոփոխ չեմպիոնը։ Իր 25 տարվա պատմության ընթացքում, «Շերիֆը» 20 անգամ դարձել է Մոլդովայի չեմպիոն, 11 անգամ՝ գավաթակիր և 7 անգամ՝ սուպերգավաթակիր։ «Շերիֆը» նաև 2 անգամ (2003, 2009թթ․) դարձել է ԱՊՀ և Բալթյան երկրների Համագործակցության Գավաթի խաղարկության հաղթող։
Մարզադաշտը
Թիմը սեփական հարկի տակ իր հանդիպումներն անցկացնում է «Շերիֆ» մարզադաշտում, որի բացումը տեղի է ունեցել 2002թ․-ի հունիսին։ Մարզադաշտը տեղավորում է 12746 հանդիսական:
«Շերիֆը»՝ եվրոգավաթներում
Մոլդովայի չեմպիոնը եվրոգավաթներում հանդես գալու զգալի փորձ ունի։ Իր նորամուտը եվրոպական մրցաշարերում «Շերիֆը» նշել է 1999/00թթ․ ՈւԵՖԱ-ի գավաթի խաղարկությունում։ Եվրոգավաթներում առաջին լուրջ նվաճմանը «Շերիֆը» հասել է 2009/10թթ․ մրցաշրջանում, երբ հասնելով Չեմպիոնների Լիգայի խաղարկության փլեյ-օֆֆ փուլ, այնտեղ երկու հանդիպումներում զիջել էր հունական «Օլիմպիակոսին», սակայն Եվրոպա Լիգայի անդրանիկ խաղարկության խմբային փուլի ուղեգիր էր ձեռք բերել։
Եվրոգավաթների խաղարկություններում «Շերիֆը» 4 անգամ հանդիպել է հայկական ակումբների հետ և բոլոր դեպքերում էլ կարողացել է հաղթել ընդհանուր դիմակայություններում։ Ընդ որում, բոլոր հանդիպումները կայացել են Չեմպիոնների Լիգայի խաղարկության շրջանակներում։ 2001/02թթ․ մրցաշրջանում «Շերիֆը» երկու հանդիպումներում առավելության է հասել Արարատի «Արաքսի» (2:0, 1:0), 2006/07թթ․ մրցաշրջանում՝ «Փյունիկի» (2:0, 0:0), 2012/13թթ․ մրցաշրջանում՝ «Ուլիսի» (1:0, 1:0) և 2021/22թթ․ մրցաշրջանում՝ «Ալաշկերտի» նկատմամբ (3:1, 1:0):
Նախորդ մրցաշրջանը լավագույնն էր «Շերիֆի» պատմության մեջ: Մոլդովական ակումբը դարձավ Չեմպիոնների լիգայի գլխավոր անակընկալի հեղինակը՝ հասնելով մինչև խմբային փուլ և առաջին երկու տուրերում կարողացավ սենսացիոն հաղթանակներ տանել Դոնեցկի «Շախտյորի» և մրցաշարի ապագա հաղթող՝ Մադրիդի «Ռեալի» նկատմամբ»։
