Ֆուտբոլի Հայաստանի ազգային հավաքականը հունիսի 5-ին կանցկացնի իր հերթական հանդիպումը՝ արտագնա խաղում մրցելով Շվեդիայի հավաքականի հետ:
Շվեդիայի դեմ հանդիպումը Կապառոսի գլխավորությամբ այս տարվա 2-րդ ընկերական խաղն է Հայաստանի ազգային թիմի համար:
Մայիսի 1-ին Հայաստանի հավաքականը ոչ-ոքի խաղաց աշխարհի փոխչեմպիոն Խորվաթիայի ընտրանու դեմ: Վբեյմար Անգուլոյի շքեղ գոլի շնորհիվ մեր թիմը խաղն ավարտեց 1-1 հաշվով: Հայաստանի հավաքականը մինչև այս երբեք չէր խաղացել Խորվաթիայի ընտրանու դեմ, և հետաքրքրական է, որ առաջիկա մրցակցի՝ Շվեդիայի հավաքականի հետ նույնպես մեր ազգային թիմի ճանապարհները երբևէ չեն հատվել:
Շվեդիայի ազգային թիմը ՈւԵՖԱ-ի 55 անդամ երկրներից կլինի 46-րդը, որի հետ Հայաստանի հավաքականը կհանդիպի: Շվեդիայի հավաքականից բացի Հայաստանի թիմը ՈւԵՖԱ-ի անդամ երկրի հավաքականներից երբեք չի խաղացել Ադրբեջանի, Կոսովոյի, Շվեյցարիայի, Ավստրիայի, Շոտլանդիայի, Ֆարեյրան Կղզիների, Սլովենիայի, Անգլիայի և Սան Մարինոյի հավաքականների հետ:
Եվս 6 հավաքականներ, որոնց հետ Հայաստանի ազգային թիմն անցկացրել է միայն ընկերական խաղեր և երբևէ ընտրական փուլերում չի եղել նույն խմբում. Դրանք են՝ Լյուքսեմբուրգի, Լիտվայի, Իսրայելի, Մոլդովայի, Լատվիայի, Խորվաթիայի և Հունգարիայի հավաքականները: Այս թիմերին վաղը կավելանա նաև Շվեդիայի հավաքականը:
Շվեդիայի հավաքականը ՖԻՖԱ-ի դասակարգման աղյուսակում 18-րդն է, Հայաստանի հավաքականը, հիշեցնենք՝ 90-րդը:
Շվեդիայի ազգային հավաքականի համար այս խաղը կլինի վերջինը Եվրո-2020-ի եզրափակիչ փուլից առաջ: Մայիսի 29-ին շվեդներն ընկերական խաղում 2:0 հաշվով առավելության հասան Ֆինլանդիայի հավաքականի նկատմամբ: Եվրո-2020-ում Շվեդիայի ընտրանին ընդգրկված է E խմբում, որտեղ կմրցի Լեհաստանի, Սլովակիայի և Իսպանիայի ընտրանիների հետ: Շվեդները Եվրոյում պայքարը կսկսեն հունիսի 14-ին՝ Իսպանիայի հավաքականի հետ խաղով: Հետաքրքրական է, որ այս երկու թիմերը մրցակից էին նաև որակավորման փուլում: F խմբում Իսպանիայի հավաքականը 26 միավորով գրավել էր առաջին տեղը, իսկ շվեդները 2-րդն էին 21 միավորով:
Շվեդիա-Հայաստան հանդիպումը կկայանա հունիսի 5-ին և կմեկնարկի Երևանի ժամանակով 22:45-ին: Խաղը կկայանա «Ֆրենդս Արենա» մարզադաշտում, որը տեղավորում է 50 հազար հանդիսական: Այստեղ իր տնային հանդիպումներն է անցկացնում երկրի հեղինակավոր թիմերից մեկը՝ ԱԻԿ-ը: Մարզադաշտը գտնվում է մայրաքաղաք Ստոկհոլմի շրջանի մաս կազմող Սոլնա քաղաքում, որն ունի մոտ 70 հազար բնակիչ:
Այս հանդիպումը Հայաստանի ազգային հավաքականի համար նախապատրաստություն է սեպտեմբերին կայանալիք Մունդիալ-2022-ի ընտրական փուլի հանդիպումների համար։ Խոակին Կապառոսի գլխավորությամբ ազգային թիմը շարունակում է վերելքը: Հայաստանի հավաքականը պարտություն չի կրել 9 խաղում անընդմեջ, իսկ Մունդիալի որակավորման փուլի մեկնարկում ցույց տվեց, որ ունակ է անել ավելին: Անցկացրած 3 խաղերից հետո Կապառոսի թիմը վաստակած 9 միավորով գլխավորում է J խմբի մրցաշարային աղյուսակը:
Հիշեցնենք, որ սեպտեմբերին Հայաստանի հավաքականը կանցկացնի 3 հանդիպում: Սեպտեմբերի 2-ին և 5-ին Կապառոսի թիմը արտագնա խաղեր կանցկացնի Հյուսիսային Մակեդոնիայի ու Գերմանիայի հավաքականների հետ, իսկ սեպտեմբերի 8-ին Երևանում կընդունի Լիխտեյնշտեյնի ընտրանուն:
Իհարկե, նման ուժեղ հավաքականների հետ հանդիպումը լավ առիթ է Միստր Կապառոսի համար փորձարկել թիմի նորեկներին և հենց գործի մեջ տեսնել նրանց ներուժը, ինչը տեսանք Խորվաթիայի հետ խաղում: Անկախ հանդիպման բնույթից, կարևորագույն խաղերից առաջ անպարտելիության շարքը չընդհատելը հոգեբանական առումով դրական կազդի ֆուտբոլիստների վրա սեպտեմբերին կայանալիք անչափ կարևոր խաղերից առաջ:
Երվանդ ՀԱԿՈԲՅԱՆ