Ֆուտբոլի Հայաստանի ազգային հավաքականն այսօր սկսում է ընկերական խաղերի շարքը, որը բաղկացած է 2 հանդիպումից:
Այսօր մրցելու ենք ոչ ավել, ոչ պակաս աշխարհի փոխչեմպիոն Խորվաթիայի ընտրանու հետ:
Ընդհանրապես, ընկերական հանդիպումները նախատեսված են փորձարկումների համար: Դա է պատճառը, որ ազգային թիմի ճամբարում են նոր ու երիտասարդ ֆուտբոլիստներ, իսկ ազգային հավաքականի ավագ ու առաջատար Հենրիխ Մխիթարյանը բացակայում է հայտացուցակից: Հենց այսպես մեկնաբանեց հավաքականի գլխավոր մարզիչ Խոակին Կապառոսը Հենոյի բացակայությունը: Կապառոսը երեկ կայացած նախախաղային մարզմանը կրկին պատասխանելով այդ հարցին՝ նշեց, որ նա փորձարկումների կարիք ունի ու այդ պատճառով Հենոն չկա ազգային թիմի ճամբարում, բայց հույս հայտնեց, որ սեպտեմբերին Մխիթարյանը կլինի Հայաստանի հավաքականի կողքին: Վատառողջ լինելու պատճառով հավաքականում չէ Գևորգ Ղազարյանը, իսկ վնասվածքի պատճառով առաջին խաղին չի մասնակցի Վարազդատ Հարոյանը:
Հայաստանի ու Խորվաթիայի ազգային հավաքականներն առաջին անգամ են հանդիպելու: Այս թիմերը երեքական հանդիպում են անցկացրել Մունդիալ-2022-ի ընտրական փուլում: Ինչպես գիտենք, մեր հավաքականը 100 տոկոսանոց արդյունքով խմբի առաջատարն է, իսկ Խորվաթիան իր խմբում 3 խաղից 2-ում հաղթել է, մեկում՝ պարտվել. խորվաթները պարտվել են Սլովենիային:
Խոակին Կապառոսի գլխավորությամբ Հայաստանի ազգային հավաքականն անցկացրել է 9 հանդիպում, որոնցից հաղթել է 8-ում, պարտվել՝ 1-ում. այն էլ առաջին խաղում: Ստացվում է, որ վերջին 8 խաղում մեր թիմն անպարտելի է. ավելին, վերջին 5 խաղում մերոնք միայն հաղթում են: Կապառոսի օրոք խաղացած 9 խաղում մեր թիմը խփել է 15 գնդակ, բաց թողել 8 գոլ: Ինչ վերաբերում է Խորվաթիայի հավաքականին, վերջին 9 խաղում աշխարհի փոխչեմպիոնները տարել են 3 հաղթանակ, կրել 6 պարտություն: Այո, պարտությունները շատ են, բայց պարտվել են Ֆրանսիային (2 անգամ), Պորտուգալիային (2 անգամ), Շվեդիային ու Սլովենիային:
Խորվաթիան վերջին նախապատրաստական փուլն է անցկացնում ԵՎՐՈ-2020-ից առաջ: Հասկանալի է, որ մրցակցի մարզչկան շտաբը ևս փորձարկումների կարիք կունենա ու կփորձի թիմում հետ բերել խաղակցվածությունը: Ակնհայտ է, որ ամենաուժեղ կազմը 90 րոպե չի խաղա: Ակնհայտ է, որ մրցակից խաղում զգուշավորություն կլինի՝ վնասվածք չստանալու համար: Ամենադաժանն է թիմի համար, երբ կարևոր մրցաշարից առաջ թիմի առանցքային ֆուտբոլիստներն ընկերական խաղերի ժամանակ վնասվածքն են ստանում:
Հայաստանն այդպիսի դաժան փորձ հիշում է՝ Գերմանիայի համար: Երբ Գերմանիա-Հայաստան ընկերական խաղի ժամանակ Արթուր Եդիգարյանը ծանր վնասվածք հասցրեց Մարկո Ռոյսին ու վերջինս չմասնակցեց Մունդիալ-2014-ին:
Առաջին անգամ ազգային հավաքական է հրավիրվել «Ալաշկերտի» կիսապաշտպան Դավիդ Դավիդյանը, բայց VBET ՀՊԼ-ի վերջին տուրում Դավիդյանը վնասվածք է ստացել ու, ցավոք, այս անգամ էլ չենք կարող նրան տեսնել գործում: Միանշանակ, խաղադաշտում կտեսնենք, «Արարատ-Արմենիայի» պաշտպաններ Դավիթ Տերտերյանին ու Ալբերտ Խաչումյանին: Դժվար է ասել, թե որ խաղում ով կխաղա, բայց եթե նրանք այս պահին ճամբարում են, և մարզիչն էլ փորձարկումների կարիք ունի, ուրեմն, նրանց խաղադաշտում կտեսնենք:
Հետաքրքիր կլինի դարպասում տեսնել ԲԿՄԱ-ի երիտասարդ դարպասապահ Արման Ներսեսյանին: Երիտասարդ դարպասապահի համար ահռելի փորձ կլինի: Ֆուտբոլիստները սովորաբար ակումբներում են խաղաժամանակ ստանում ու ազգային հավաքական հրավիրվելու համար պայքարում, սակայն այս անգամ պատկերը մի փոքր այլ է: Երկրորդ դարպասապահը «Արարատից» Գրիգոր Մելիքսեթյանն է: Հավաքականի կազմում տարբեր ժամանակներում խաղացած դարպասապահը կրկին ընտրանու մարզչական շտաբի ուշադրության կենտրոնում է: Սա նշանակում է, որ Կապառոսը հավատում է Մելիքսեթյանին, ու պատկերացնում եք՝ եթե Միստերն է հավատում նրան, Գրիգորի համար այս պահին միայն թիմում լինելը ինչ ահռելի քայլ է՝ խորը քնից զարթնելու ու երկրորդ շնչառությամբ խաղալու համար: Սա կարող է բեկումնային պահ լինել Մելիքսեթյանի համար:
Կազմի հարցում պետք չէ փորձել գուշակություններ անել, քանի որ միայն իսպանացի մասնագետը գիտի, թե որ խաղում ինչ է ուզում տեսնել խաղադաշտում:
Սպասենք ու վստահ լինենք, որ արժանապատիվ ֆուտբոլ ենք խաղալու՝ ինչպես վերջին մեկ տարվա ընթացքում:
Խաղը կայանալու է Վելիկա Գորիցայի «Քաղաքային» մարզադաշտում, մեկնարկը՝ Երևանի ժամանակով 20:00-ին է:
Հանդիպումը կսպասարկեն բոսնիացի մրցավարները՝ Լուկա Բիլբիյայի գլխավորությամբ։ Նրան կօգնեն Ամեր Մաչիչը և Դավոր Բելյոն: Չորրոդ պաշտոնյան է Իգոր Պայաչը Խորվաթիայից։
Արմեն Գարամյան