Երևանում կայացել է Gold’s Gym Cup թենիսի միջազգային մրցաշար, որին մասնակցել են 12 երկրի մինչև 14 տարեկան ուժեղագույն թենիսիստները:
Մրցաշարը անցկացրել է Հայաստանի թենիսի ֆեդերացիան «In court» ակումբի հետ համատեղ:
«Ծրագրել ենք անցկացնել միանգամից երկու մրցաշար: Այս մրցաշարը 3-րդ կատեգորիայի մրցաշար է, իսկ ավարտից անմիջապես հետո կսկսվի 2-րդ կատեգորիայի մրցաշարը: 12 երկրից՝ այդ թվում Հայաստանից, մասնակցում են 57 մարզիկ-մարզուհիներ»,-ArmSport-ի հետ զրույցում ասաց Հայաստանի թենիսի ֆեդերացիայի գործադիր տնօրեն Գևորգ Կարամանուկյանը:
Նրա խոսքով այս մրցաշարի նպատակն է մասսայականացնել թենիսը Հայաստանում.
«Նպատակը Հայաստանում թենիսի զարգացումն ու մասսայականությունն է, ինչպես նաև հնարավորության ընձեռումը հայ մարզիկներին՝ առանց գումար ծախսելու հենց տեղում մասնակցել այս տեսակ միջազգային մրցաշարի, և հաղթելու դեպքում վարկանիշային միավորներ վաստակել»,-նշեց Կարամանուկյանը:
Այս մրցաշարում Հայաստանն ուներ 12 ներկայացուցիչ՝ 4-ը աղջիկների, 8-ը՝ տղաների պայքարում: Հայ թենիսիստներից ամենաբարձր վարկանիշն ունի Միքայել Ավանեսյանը, ով վարկանիշով «թենիս Եվրոպայում» 105-րդն է:
Տղաների պայքարում հավասարը չուներ Ֆրանսիայի ներկայացուցիչը, ով եզրափակչում հաղթեց ռուս մրցակցին: 14-ամյա Լենի Պետիտի համար սա առաջին հաղթանակն էր միջազգային մրցաշարերում:
«Թվում է, թե մրցումները հեշտ են, բայց բոլոր խաղերն էլ դժվար են եղել: Սկզբում մրցակցությունը թույլ էր, բայց խաղերը գնալով բարդացան: Տպավորություններս շատ դրական են հայկական թենիսի մասին: Ես խաղացել եմ նաև հայ մարզիկի հետ: Հայաստանում կա ուժեղ թենիսիստ՝ ի դեմս Միքայել Ավանեսյանի: Երկու շաբաթ առաջ Ալբանիայում զուգախաղերի եմ մասնակցել իր հետ: Շատ ուրախ եմ, որ հաղթեցի իմ առաջին միջազգային մրցումն ու հաջորդ շաբաթ արդեն կմտնեմ լավագույն 100-յակի մեջ»,-նշեց ֆրանսիացի պատանի մարզիկը:
Gold’s Gym Cup մրցաշարն անցկացվում է երկրորդ անգամ: Առաջին անգամ այն կայացել է 2019-ին, իսկ նախորդ տարի կորոնավիրուսի համավարակի ու պատերազմի պատճառով չի կայացել: Մրցաշարին աջակցում էր «Փյունիկ» ֆուտբոլային ակումբի սեփականատեր Արթուր Սողոմոնյանը:
«Անցած տարի պանդեմիայի պատճառով մրցաշարը չկայացավ: Մտադրված ենք այս մրցաշարը դարձնել ավանդական: Հուսով ենք, որ ամեն տարի մայիսին Հայաստան կգան այդ տարիքի լավագույն թենիսիստները: Ամեն ինչ կազմակերպված է բարձր մակարդակով»,-նշեց Սողոմոնյանը:
Նրա խոսքով, նման մրցաշարերի անցկացումը Հայաստանում շատ կարևոր է հայ թենիսիստների համար:
«Ես համզոված եմ, որ սա կնպաստի թենիսի զարգացմանը, քանի որ մեր երեխաների համար դժվար է գնալ այլ երկրներ ու մրցել նման մարզիկների հետ: Մեր երեխաների մեջ մոտիվացիա է առաջանում, որ ավելի առաջ գնան»,-ասաց Արթուր Սողոմոնյանը:
Նախորդ տարին ինչպես ամբողջ մարզաշխարհի, այնպես էլ թենիսի համար ծանր տարի էր։
«Նախորդ տարին պլանավորել էինք շատ մրցաշարեր, բայց հասկանալի պատճառներով տեղի չունեցան: Նախատեսել էինք, հոկտեմբերին 4 ITF մրցաշար անցկացնել մինչև 18 տարեկանների: Պատրաստվում էինք կորոնավիրուսի պայմաններում, որը շատ բարդ էր, բայց պատերազմը սկսվեց ու բոլոր մրցաշարերը չեղյալ արվեցին: Այս տարի սա առաջին մրցաշարն է»,-նշեց ֆեդերացիայի գործադիր տնօրեն Գևորգ Կարամանուկյանը:
Նշենք, որ այս օրերին Երևանում է և մրցաշարին հետևում էր նաև Ռուսաստանի թենիսի ֆեդերցիայի նախագահ Շամիլ Տարպիսչևը: Վերջինս ֆեդերացիայի կողմից պարգևատրվեց պատվոգրով:
Մարզական տարին հայ թենիսիստների համար այսքանով չի ավարտվում: Այս տարի ծրագրված են ևս մի քանի մրցաշարեր:
«Այս տարի անցկացնելու ենք մինչև 12, 14 և 16 տարեկանների մրցաշարեր, ինչպես նաև ITF -ի պատանեկան մրցաշար: Այս տարի հագեցած է լինելու մեզ համար, եթե խանգարող այլ բաներ չլինեն», -խոսելով առաջիկա անելիքների մասին ասաց ֆեդերացիայի գործադիր տնօրենը:
Ինչ վերաբերում է մեծահասակներին, հունսին Հայաստանի կանանց հավաքականը մասնակցելու է «Billie Jean King Cup» աշխարհի թիմային խաղարկությանը, որը կայանալու է Լիտվայում, իսկ տղամարդկանց հավաքականը Հյուսիսային Մակեդոնիայում մասնակցելու է Դեյվիսի գավաթի խաղարկությանը:
Երվանդ ՀԱԿՈԲՅԱՆ