Ավարտվեց ֆուտբոլի VBET ՀՊԼ-ի 2020/21 մրցաշրջանը: 2 տարվա դադարից հետո Հայաստանը նոր չեմպիոն ունի: Նոր մրցաշրջանում, ակումբային ամենահեղինակավոր մրցաշարում մեր երկիրը կներկայացնի «Ալաշկերտը»: Վերջինս այսօր 4-րդ անգամ հռչակվեց Հայաստանի չեմպիոն:
Առաջնության ավարտից 3 տուր առաջ ակումբի սեփականատեր Բագրատ Նավոյանը ռիսկային քայլի գնաց: Խաշմանյանը հեռացվեց, ում փոխարինեց Ալեքսանդր Գրիգորյանը: Վերջինս ֆանտաստիկ նորամուտ ունեցավ ու առաջնության մնացած 3 խաղում տոնեց նույնքան հաղթանակ ու «Ալաշկերտին» չեմպիոնություն պարգևեց: Ստացվում է, որ շատ ճիշտ պահին կատարվեց մարզչական փոփոխություն, որն էլ տվեց իր դրական արդյունքը:
Վերջին տուրում բոլոր խաղերը մեկնարկեցին միաժամանակ: Չեմպիոնական պայքարում 2 թիմ էր. «Ալաշկերտն» ու «Նոան»: Ցանկացած պարագայում «Նոային» հաղթանակ էր անհրաժեշտ՝ չեմպիոնական պայքարում մնալու համար, բայց Գունկոյի թիմը տնային խաղում 1-2 հաշվով պարտվեց ոչնչի համար չպայքարող, առաջատարների «ահ ու սարսափ» դարձած «Վանին»: Չնայած պարտությանը, «Նոան» մնաց երկրորդ տեղում ու երկրորդ տարին անընդմեջ հռչակվեց Հայաստանի փոխչեմպիոն, իսկ «Վանը» զբաղեցրեց 6-րդ հորիզոնականը:
Չեմպիոն «Ալաշկերտն» ընդունեց եվրագավաթային պայքար մղող «Արարատ-Արմենիային» ու հաղթեց 1-0 հաշվով: «Արարատ-Արմենիան» ոչ միայն պարտվեց այս խաղում, այլև կարելի է ասել, որ առհասարակ պարտվեց առաջնությունում ու, գրավելով 5-րդ հորիզոնականը, զրկվեց միջազգային խաղերի ուղեգրից: Այս առաջնությունը, միանշանակ, «Արարատ-Արմենիայի» համար կարելի է ձախողված համարել:
Մրցանակային երրորդ տեղը զբաղեցրեց առաջնության վերջում հրաշալի ֆուտբոլ ցուցադրող «Ուրարտուն»: Վերջին տուրում Արզումանյանի թիմը նվազագույն հաշվով հաղթեց «Փյունիկին»: «Փյունիկը» առաջնությունն ավարտեց 7-րդ տեղում:
Գավաթակիր «Արարատը» վերջին տուրում 5-2 հաշվով հաղթեց «Շիրակին» ու վերջնական արդյունքում զբաղեցրեց 4-րդ հորիզոնականը, իսկ «Շիրակը» մրցաշրջանն ավարտեց 9-րդ հորիզոնականում:
Այսպիսով, ՉԼ-ի հաջորդ խաղարկությունում Հայաստանը կներկայացնի «Ալաշկերտը», իսկ Կոնֆերենցիալ լիգայում Հայաստանի պատվիրակները կլինեն «Արարատը», «Նոան» ու «Ուրարտուն»:
Արմեն Գարամյան