Ֆուտբոլի VBET ՀՊԼ-ի 2020/21 մրցաշրջանը մոտենում է ավարտին: «Արարատ-Արմենիայի»՝ 2 տարվա դոմինանտությունից հետո Հայաստանը ֆուտբոլի նոր չեմպիոն կունենա: Առաջնության ավարտին մնացել է միայն մեկ տուր: Չեմպիոնական պայքարում մնացել է 2 թիմ: Եթե 2 տուր առաջ այդ թիմերը 4-ն էին, ապա հետաձգված մի խաղի կայացումից հետո պատկերն առավել քան ցայտուն դարձավ: «Արարատը» վերջին 2 խաղում պարտություն կրեց ու կորցրեց չեմպիոնության հարցերը, իսկ «Արարատ-Արմենիան», ինչպես ամբողջ առաջնության ընթացքում, այնպես էլ վերջնամասում, անկայուն տեսք ուներ ու չեմպիոնության շանս չունի:
Փոխարենը, միանգամայն արժանի մրցակիցներ են «Նոան» ու «Ալաշկերտը», և ինչ հետաքրքիր կլիներ, որ եթե վերջին տուրում միմյանց հետ մրցեին հենց այս թիմերը:
Այնպես ստացվեց, որ «Ալաշկերտը» ճիշտ պահին մարզչական փոփոխություն կատարեց, և նորանշանակ մարզիչ Ալեքսանդր Գրիգորյանը անընդմեջ հաղթանակ տոնեց չեմպիոնության 2 հավակնորդի նկատմամբ ու դուրս թողեց մրցավազքից:
Այս պահին առաջատարը «Ալաշկերտն» է՝ 43 միավորով: 41 միավորով երկրորդ տեղում «Նոան» է:
Վերջին տուրում «Ալաշկերտը» մրցում է սասանված հեղինակությունը վերականգնել փորձող, գործող չեմպիոն «Արարատ-Արմենիայի» հետ, իսկ «Նոան» ընդունելու է «Վանին»: Այո, առաջին հայացքից, Գումկոյի թիմն ավելի նախընտրելի մրցակից ունի, սակայն «Ալաշկերտին», չեմպիոն դառնալու համար, բավարար է նույնիսկ ոչ-ոքին: Հավասար միավորների դեպքում, առավելությունը կլինի «Ալաշկերտինը», քանի որ անձնական խաղերում «Ալաշկերտն» առավելություն ունի: Առաջնության 3 խաղից 2-ում հաղթել է «Ալաշկերտը», մեկում հաղթել է «Նոան»:
Ամենահետաքրքիրը՝ «Նաիրի» ստադիոնում
«Ալաշկերտը» սեփական հարկի տակ է ընդունելու «Արարատ-Արմենիային», որին օրեր առաջ հաղթեց Ավանում՝ ծանրագույն խաղում՝ 2-1 հաշվով: Առաջին տուրում այս թիմերը գոլազուրկ ոչ-ոքի էին խաղացել: Բայդաչնիի թիմին ևս հաղթանակ է անհրաժեշտ, քանի որ եվրագավաթային պայքարին ներգրավված է նաև «Ուրարտուն», որն իր հերթին փայլուն մարզավիճակում է գտնվում: Պարտության դեպքում, ցանկացած պարագայում, «Արարատ-Արմենիան» կարող է ձախողած համարել առաջնությունը, քանի որ միջազգային խաղերի ուղեգրից կզրկվի վերջին տարիների հայկական ֆուտբոլի ամենաուժեղ թիմը, բայց այնպես չէ, որ հաղթանակը ուղեգիր է ապահովում, բայց այդ մասին՝ ստորև:
Հնարավոր չեմպիոնություն՝ Ավանում
Ինչպես նշեցի, չեմպիոնության մյուս հավակնորդն է «Նոան»: «Ալաշկերտի» ձախողվելու պարագայում, «Նոան» կարող է դառնալ Հայաստանի չեմպիոն: Նախորդ տարվա պես, «Նոան» առաջնության վերջում վեր բարձրացավ ու սկսեց պայքարը լավագույնի կոչման համար: Այս մրցաշրջանում ավելի իրատեսական կլինեին «Նոայի» հնարավորությունները, եթե նախորդ խաղում Գունկոյի տղաները հաղթեին «Ուրարտուին»: Ամեն ինչ «Նոայի» ձեռքերում էր, սակայն մի քանի տարվա պատմություն ունեցող թիմը չկարողացավ օգտվել իր հնարավորությունից, այդուհանդերձ ամեն ինչ կորած չէ: ՀՖֆ Տ/Կ-ում «Նոան» կընդունի «Վանին»: Չարենցավանի թիմը մի քանի օր առաջ սենսացիոն հաղթանակի հասավ «Ալաշկերտի» նկատմամբ՝ 3-1 հաշվով, որից հետո հեռացվեց Խաշմանյանը: «Նոան» ու «Վանն» այս առաջնությունում հանդիպել են 2 անգամ: 2 դեպքում էլ հաղթել է «Նոան»՝ ընդհանուր մրցակցի դարպասն ուղարկելով 4 գնդակ, իսկ սեփականը՝ պահելով անառիկ: Խաղում, միանշանակ, ֆավորիտ է համարվում «Նոան», քանի որ «Վանը», մեծ հաշվով չի պայքարում ոչնչի համար: Նույնիսկ, եթե «Վանը» պարտվի, իսկ «Փյունիկը» հաղթի, լրացուցիչ արդյունքներով չարենցավանյան թիմը կմնա 6-րդ տեղում:
«Ուրարտուն» մրցելու է «Փյունիկի» հետ ու, մեծ հաշվով, Արզումանյանի թիմը ֆավորիտ է այդ խաղում: Եթե հաղթում է «Ուրարտուն», երրորդ հորիզոնականն է գրավում ու եվրագավաթային ուղեգիր նվաճում: «Ուրարտուն» ու «Արարատ-Արմենիան» հավասար միավոր ունեն այս պահին, բայց լրացուցիչ արդյունքներով «Ուրարտուն» առջևում է: Թիմերն անցկացրած 3 խաղում տոնել են մեկական հաղթանակ, մեկ խաղ ավարտել ոչ-ոքի: Խփած-բաց թողած գոլերի տարբերությունը 2-2 է, իսկ հաջորդ լրացուցիչ արդյունքը հաղթանակների թիվն է, և այդ ցուցանիշով առաջատարը «Ուրարտուն» է:
Տուրի վերջին դիմակայությունը «Արարատի» ու «Շիրակի» միջև է: Քանի որ Եվրոպա Լիգայի ուղեգիր չի խաղարկվում, նշանակում է, որ «Արարատը», լավագույն դեպքում, կարող է բարելավել մրցաշարային իրադրությունը՝ բարձրանալով երրորդ հորիզոնական: Միայն հաղթանակը կնպաստի դրան, սակայն զուգահեռաբար պետք է պարտվեն «Ուրարտուն» ու «Արարատ-Արմենիան»: «Շիրակն» էլ այս պահին 13 միավորով 9-րդն է ու չի կարող վեր բարձրանալ:
Մնում է սպասել առաջնության վերջին տուրին, քանի որ, իրոք, թեժ է լինելու: Խաղերը մեկնարկելու են միաժամանակ:
Հիշեցնենք, որ Հայաստանի առաջնությունում առաջին տեղը գրաված թիմը նվաճում է ՉԼ-ի որակավորման փուլի ուղեգիր, իսկ երկրորդ, երրորդ տեղերը գրաված թիմերը, ինչպես նաև Հայաստանի գավաթակիրը նվաճում են Կոնֆերենցիալ Լիգայի որակավորման փուլի ուղեգիր:
Բոլոր հանդիպումները կկայանան մայիսի 28, և կմեկնարկեն ժամը 17։30։
Արմեն Գարամյան
