Թուրինի «Յուվենտուսի» պաշտպան Ջորջիո Կյելինին Ա Սերիայի 38-րդ տուրի՝ «Բոլոնիայի» հետ խաղից հետո (4-1) խոսել է իր թիմի՝ 2020/2021 մրցաշրջանում ելույթների մասին․
«Մենք ուրախ ենք Պիռլոյի համար։ Սա նրա առաջին մրցաշրջանն էր, ու այն հեշտ չէր։ Մենք թեթևությամբ շունչ քաշեցինք, քանի որ երկու շաբաթ առաջ՝ «Միլանից» կրած պարտությունից հետո, մտածում էինք, որ այս արդյունքին հասնելն անհնարին կլինի։
Եթե մենք ամբողջ մրցաշրջանում այսպես տրամադրված լինեինք, չէինք հայտնվի նման իրավիճակում, բայց զղջալու ոչինչ չկա։ «Ինտերն» արժանի էր չեմպիոնության։ Այս մրցաշրջանում մենք երկու տիտղոս նվաճեցինք ու Չեմպիոնների լիգայի հաջորդ մրցաշրջանի ուղեգիր վաստակեցինք։ Սա ամենից կարևորն է»,- Կյելինիի խոսքերն է փոխանցում Goal.com-ը։
«Յուվենտուսը» 78 միավոր է վաստակել ու Ա Սերիայի մրցաշարային աղյուսակի 4-րդ հորիզոնականը զբաղեցրել, որը Չեմպիոնների լիգայում հանդես գալու իրավունք է տալիս։
