Երեկ՝ մայիսի 2-ին, եվրոպական միանգամից երեք լիգաներում հայտնի դարձան 2020/21 մրցաշրջանի չեմպիոնները, ընդ որում, բոլոր երեք դեպքերում էլ չեմպիոնները որոշվեցին ժամանակից շուտ։
🇮🇹 Ինտեր․ Իտալիա
«Ինտերին» վերջապես հաջողվեց գահընկեց անել թուրինյան գրանդին իտալական ֆուտբոլի գահից։ Իտալիայի Ա Սերիայի 34-րդ տուրի շրջանակում «Ատալանտան» հյուրընկալվելիս չկարողացավ հաղթել «Սասուոլոյին»՝ 1-1: Սա նշանակում է, որ Անտոնիո Կոնտեի թիմը, անկախ վերջին 4 տուրի արդյունքից, դառնում է Ա Սերիայի հաղթող: Նշենք, որ շաբաթ օրը միլանյան ակումբը 2-0 հաշվով հաղթել էր «Կրոտոնեին»։
2012 թ-ից ի վեր Ա Սերիայի չեմպիոնը միայն «Յուվեն» էր: Սա «Ինտերի» 19-րդ Սկուդետոն էր:
🇷🇺 Զենիթ․ Ռուսաստան
Ռուսաստանի Պրեմիեր լիգայի 28-րդ տուրում «Զենիթը» սեփական հարկի տակ 6:1 հաշվով ջախջախեց «Լոկոմոտիվին» և ժամանակից շուտ ապահովեց ոսկե մեդալները: «Զենիթը» 7-րդ անգամ նվաճեց Ռուսաստանի չեմպիոնությունը (2007, 2010, 2011/12, 2014/15, 2018/19, 2019/20, 2020/21):
Այս ցուցանիշով «Զենիթը» շրջանցեց ԲԿՄԱ-ն, որը 6 անգամ էր դարձել Ռուսաստանի չեմպիոն, իսկ ռեկորդակիրը «Սպարտակն» է, որը 10 անգամ դարձել է երկրի չեմպիոն (1992, 1993, 1994, 1996, 1997, 1998, 1999, 2000, 2001, 2016/17): «Լոկոմոտիվը» 3 անգամ է դարձել Ռուսաստանի չեմպիոն (2002, 2004, 2017/18), «Ռուբինը» ՝ 2 անգամ (2008, 2009), «Սպարտակ-Ալանիան»՝ 1 անգամ (1995):
Ի դեպ, Իտալիայի նորընծա չեմպիոնի՝ «Ինտերի» մամուլի ծառայությունը շնորհավորել է ռուսական ակումբին չեմպիոն հռչակվելու կապակցությամբ։
🇳🇱 Այաքս․ Նիդերլանդներ
«Այաքսը» ժամանակից շուտ ապահովեց հաղթանակը ներքին առաջնությունում: 31-րդ տուրում Տեն Հագի թիմը 4 անպատասխան գնդակ ուղարկեց «Էմմենի» դարպասն ու անհասանելի դարձավ մրցակիցների համար:
Սա «Այաքսի» համար 35-րդ չեմպիոնությունն էր, ինչը ռեկորդ է Նիդերլանդներում: Հիշեցնենք, որ նախորդ մրցաշրջանն անավարտ էր մնացել Covid-19-ի պատճառով և 2019/20 մրցաշրջանի չեմպիոն էր ճանաչվել հենց «Այաքսը»: