ՀՖՖ Գործկոմի՝ այսօր տեղի ունեցած նիստում կայացվեցին որոշումներ VBET Հայաստանի Պրեմիեր Լիգայում արտասահմանցի ֆուտբոլիստների քանակի փոփոխության, ինչպես նաև 2020 թվականին կայացած «Շիրակ»-«Նոա» և «Գանձասար-Կապան»-«Վան» հանդիպումների ընթացքում գրանցված միջադեպերի մասնակիցների վերաբերյալ: Այս մասին տեղեկացնում է ՀՖՖ պաշտոնական կայքը։
Նշվում է, որ նիստի օրակարգի առաջին հարցը ՀՖՖ Կարգապահական և էթիկայի կոմիտեի միջնորդության քննարկումն էր: Միջնորդության վերաբերյալ որոշումը կայացվել էր ՀՖՖ Կարգապահական և էթիկայի կոմիտեի՝ 2020 թ. դեկտեմբերի 18-ին կայացած նիստում, որի արձանագրությանը կարող եք ծանոթանալ այստեղ։
«Վերոնշյալ հանդիպումների ընթացքում տեղի ունեցած միջադեպերի մասնակիցներ Արարատ Հարությունյանը, Արման Սահակյանը և Սարգիս Ասոյանը Հայաստանի ֆուտբոլի ֆեդերացիայի կողմից հրավիրվել էին ՀՖՖ գրասենյակ՝ միջադեպերի հետ կապված բացատրություն տալու, սակայն նրանցից որևէ մեկը չէր ներկայացել ՀՖՖ: Արման Սահակյանը գրավոր բացատրություն էր ներկայացրել ՀՖՖ՝ խնդրելով դա ընդունել որպես հիմք և ընթերցել ՀՖՖ Գործադիր կոմիտեի նիստի ընթացքում:
ՀՖՖ Գործադիր կոմիտեն, քննարկելով ՀՖՖ Կարգապահական և էթիկայի կոմիտեի միջնորդությունը, ևս մեկ անգամ դատապարտեց ՀՖՖ պաշտոնյաների կամ մրցավարների նկատմամբ բռնի գործողությունները՝ դրանք համարելով անթույլատրելի: ՀՖՖ Գործադիր կոմիտեն նաև որոշեց առաջարկ ներկայացնել ՀՖՖ կանոնակարգերի մշակմամբ և խմբագրմամբ զբաղվող աշխատանքային խմբին, ըստ որի, հաջորդ մրցաշրջանից սկսած, փոփոխություններ կկատարվեն ՀՖՖ Կարգապահական և էթիկայի կանոնակարգում՝ նմանատիպ իրավախախտումների դեպքում ավելի հստակ պատժամիջոցներ սահմանելու համար:
Այնուհետև տեղի ունեցած քվեարկության արդյունքում կայացվեցին հետևյալ որոշումները.
«Շիրակ» ֆուտբոլային ակումբի նախկին աշխատակից Արարատ Հարությունյանին ցմահ հայտարարել հայկական ֆուտբոլում անցանկալի անձ` «պերսոնա նոն գրատա» (7 կողմ, 1 դեմ, 3 ձեռնպահ):
Արգելել «Շիրակ» ֆուտբոլային ակումբի նախկին նախագահ Արման Սահակյանի մուտքը հայաստանյան մարզադաշտեր ՀՖՖ հովանու ներքո անցկացվող մրցաշարերում մինչև (30.05.2021) (8 կողմ, 1 դեմ, 2 ձեռնպահ):
Սարգիս Ասոյանին հայտարարել հայկական ֆուտբոլում անցանկալի անձ` «պերսոնա նոն գրատա» մինչև 2022 թ. մայիսի 31 (8 կողմ, 3 դեմ):
Օրակարգի երկրորդ հարցը VBET Հայաստանի Պրեմիեր Լիգայի հանդիպումների մասնակից թիմերի հայտացուցակներում ՀՀ-ում մարզված ֆուտբոլիստների քանակի քննարկումն էր:
Քննարկումների արդյունքում (ձայների 8 կողմ, 3 դեմ հարաբերակցությամբ) որոշվեց, որ, սկսած 2021/2022 մրցաշրջանից, VBET Հայաստանի Պրեմիեր Լիգայի հանդիպումների ժամանակ խաղադաշտում յուրաքանչյուր թիմի կազմում միաժամանակ պետք է լինի Հայաստանում մարզված, կամ Հայաստանի ազգային/տարբեր տարիքային հավաքականների անդամ առնվազն 3 ֆուտբոլիստ՝ 2-ի փոխարեն:
Որոշվեց ուժի մեջ թողնել VBET Հայաստանի Պրեմիեր Լիգայի հանդիպումների մասնակից թիմերի հայտացուցակում ընդգրկված 23 ֆուտբոլիստներից 9-ի՝ Հայաստանում մարզված (այն ֆուտբոլիստներն են, ովքեր 15 տարեկանից մինչ 21 տարեկանը գրանցված են եղել ՀՀ տարածքում գրանցված որևէ ակումբում կամ ակումբներում նվազագույնը 3 խաղաշրջան), կամ Հայաստանի ազգային/տարբեր տարիքային հավաքականների անդամներ լինելու դրույթը»,- ասվում է հայտարարության մեջ:
