«Լավ ենք սկսել, բայց շարունակում ենք ոտքերը գետնին պահել»,— ասում է Հայաստանի ազգային հավաքականի գլխավոր մարզիչ Խոակին Կապառոսը, որը ծավալուն հարցազրույց է տվել ՖԻՖԱ-ի պաշտոնական կայքին։
Ներկայացնում ենք նյութի թարգմանությունն ամբողջությամբ։
«Երբ Խոակին Կապառոսը 2000 թվականին նշանակվեց «Սևիլյայի» գլխավոր մարզչի պաշտոնում, երբեք չէր կարող ենթադրել՝ որտեղ մարզչական գործունեությամբ կզբաղվի 21 տարի անց։
Դրանից հետո՝ մինչև 2005 թվականը, նա իդեալ դարձավ Անդալուզյան ակումբում՝ իր ներդրումն ունենալով այնպիսի ապագա աստղերի զարգացման ու ուժեղացման գործում, ինչպիսիք են Սերխիո Ռամոսը, Խեսուս Նավասը, Խոսե Անտոնիո Ռեյեսը և Դանի Ալվեշը։ Իսպանիայում, Շվեյցարիայում ու նույնիսկ Քաթարում ստանձնելով բազմաթիվ ակումբների պատասխանատվությունը՝ նա 2018-ին վերադարձավ «Սևիլյա», որտեղ երկու կարճ աշխատանք ունեցավ՝ որպես ժամանակավոր մարզիչ, ապա՝ ակումբի ֆուտբոլային տնօրեն։ Հետո 2020-ի սկզբին նա զանգ ստացավ Խինես Մելենդեսից․ զանգ, որը պիտի փոխեր ամեն ինչ։
Վետերան մարզիչը, որը մեծ հաջողությունների էր հասել Իսպանիայի երիտասարդական հավաքականներում, նա էր, ով փնտրեց ու գտավ Կապառոսին, որ առաջարկի Հայաստանում աշխատանքը, քանի որ ինքը նախորդ տարի նշանակվել էր երկրի ֆուտբոլի ֆեդերացիայի տեխնիկական տնօրենի պաշտոնում։ Եվ հիմա, երբ ազգային հավաքականում մարզչի անհրաժեշտություն կար, նա վստահ էր, որ դա պիտի լինի Խոակինը։
«Նրանք ուզում են զարգանալ ու գիտեն, որ դա կախված է նրանց ունեցած մարզիչների որակավորումներից։ Նրանք հիանալի աշխատանք են անում, ու տեսնում ենք արդյունք, որը վստահություն է հաղորդում նախագահին ու բոլոր նրանց, ովքեր ներգրավված են աշխատանքում։ Սա այն ուղին է, որին պետք է հետևենք»,- ասում է Կապառոսը՝ խոսելով հայկական ֆուտբոլում փոփոխությունների մասին։
It’s just a @JoaquinCaparros appreciation tweet.
Show your love here ❤️💛❤️#Armenia #ArmenianNT #Caparros #Հայաստան #Կապառոս pic.twitter.com/jc8oswbxX7— Official Armenian FF (@OfficialArmFF) April 3, 2021
«Դեռ պայմանագիր ունեի «Սևիլյայի» հետ, բայց Խինես Մելենդեսն ասաց ինձ Հայաստանի հնարավորության մասին, և ես հանդիպեցի նրան ու ազգային ֆեդերացիայի նախագահին։ Լավ զգացողություններ ու աջակցելու զգացում կար, ուստի զարկ տվեցինք գործին ու բավականին արագ եկանք համաձայնության։ Նրանք վստահում են մեզ ու հեշտ հաղորդակցվում ենք»,- ասում է Կապառոսն այս արկածներին ձեռնամուխ լինելու մասին։
Դրանից սկսած Կապառոսի ու Հայաստանի միջև կապը միայն խորացավ, որին օգնեց մարզչի երազած մեկնարկը։ «ՈՒԵՖԱ-ի Ազգերի լիգայի B դիվիզիոնում հանդես գալու իրավունք ստանալը մեր կատարած աշխատանքի փոխհատուցումն էր, բայց դա նաև անսպասելի էր, որովհետև մրցում էինք Վրաստանի ու Հյուսիսային Մակեդոնիայի պես որակյալ հավաքականների հետ։ Դա հաջողություն էր, որը բարոյական մեծ աջակցություն էր երկրի ու թիմի համար։ Դա վերահաստատեց այն, որ
Հայաստանը պիտի հավատ ունենա արված աշխատանքի հանդեպ
ասում է Բիլբաոյի «Աթլետիկի», «Դեպորտիվո Լա Կորունիայի» և այլ թիմերի նախկին գլխավոր մարզիչը։
Այս ամենը լավագույն նախաբանն էր ԱԱ-2022-ին ընդառաջ, որի որակավորման փուլերում Հայաստանը կատարյալ մեկնարկ տվեց՝ մարտ ամսին հաղթելով բոլոր 3 խաղերն ու գլխավորելով J խմբի մրցաշարային աղյուսակը։
«Մենք որակավորման փուլերը մեծ խանդավառությամբ ենք սկսել, բայց սթափ ենք մնում՝ իմանալով որքան ուժեղ է մեր խումբը։ Լավ ենք սկսել, բայց մեր ոտքերը շարունակում ենք պահել գետնին։
Մենք մրցում ենք Ռումինիայի, Իսլանդիայի, Հյուսիսային Մակեդոնիայի ու, հատկապես, Գերմանիայի պես թիմերի դեմ, որոնք շատ ուժեղ են։ Ահա թե որտեղ ենք հայտնվել, բայց հույսով լի ու ոգևորված ենք, ու ոչ ոք դա չի կարող խլել մեզնից»,- ասում է Կապառոսը։
Can’t get enough of this 😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍😍#Armenia #ArmenianNT #Հայաստան #WCQ #EuropeanQualifiers #WC2022 pic.twitter.com/UOk5sxrc5r
— Official Armenian FF (@OfficialArmFF) April 1, 2021
65-ամյա մասնագետը գիտի, որ հիմա սթափ մնալու ժամանակն է, հատկապես, երբ հետ ես նայում մարտի խաղերին։ «Լինելով մի խմբում, որը խենթ արդյունքներ է բաշխում, մեզ համար լավ է, բայց գիտենք, որ դեռ դժվար է լինելու։ Մենք խոսում ենք թիմերի մասին, որոնք շատ լավ խաղացողներ ու հիանալի պատմություն ունեն, ինչպես Գերմանիան, որը միշտ ֆավորիտ է»։
Այնուամենայնիվ, երբ հարցնում ես հատուկ նպատակների մասին, Կապառոսը պատրաստ չէ առաջ ընկնել։
«Պիտի մեկ խաղի վրա կենտրոնանանք ու տեսնենք որքան առաջ կարող ենք գնալ։ Մինչև սեպտեմբեր որակավորման խաղ չունենք, ուստի տեսնենք խաղացողներն ինչպես են աշխատում։ Մենք հույսը դնում ենք թիմային ներուժի, ինչպես նաև մտավոր ամրության վրա»։
Ու չնայած դեռ 10 խաղ է, ինչ գլխավորում է Հայաստանի հավաքականը, իսպանացի մարզիչը շատ լավ հարմարվել է արևելյան երկրում․ «Հենց սկզբից բոլորն ինձ աջակցել են՝ նախագահից մինչև մարզչական անձնակազմ։
Ուրախություն է թիմի հավաքներին գնալն ու տղաների հետ լինելը, որովհետև նրանք շատ նվիրված են գործին»։
Կապառոսը միայն լավ բաներ է ասում ազգային հավաքականի հետ իր աշխատանքի մասին․ «Ապշեցուցիչ ակադեմիա ունենք։ Այստեղ ֆուտբոլային տասը խաղադաշտ կա, ամեն ինչ հիանալի վիճակում է, իսկ բնակելի շենքում շքեղ սենյակներ կան։ Այն ամենն ինչի կարիքն ունես․․․մեզ այստեղ շատ հարմարավետ ենք զգում»,- ասում է նա։
Բայց, վստահաբար, իսպանացի մարզչի համար Հայաստանում լեզվական պատնեշը խնդիր է։ «Թիմում 4 լեզվով ենք խոսում․ ռուսերեն, հայերեն, անգլերեն ու իսպաներեն»,- ասում է Կապառոսը՝ վստահեցնելով, որ դա խնդիր չէ․ «Շատ հեշտ ենք հաղորդակցվում, ու բացի դրանից, ֆուտբոլը համընդհանուր լեզու է։
Երբ սուլիչը հնչում է, բոլորը հասկանում են իրար։
Այս ոչ խոսքային հաղորդակցությունը հիմնարար է եղել»։
Հարցազրույցն ավարտեցինք բնիկ անդալուզացի մարզչին հարցնելով, թե Հայաստանի համար ինչ կնշանակի Եվրոպայի կամ աշխարհի առաջնության պես մրցաշար հասնելը․ «Ազգերի լիգայում ուղղակի կարգով բարձրանալը շատ էմոցիոնալ էր, ուստի կարող եմ միայն պատկերացնել՝ ինչ կկատարվի․․․Այնուամենայնիվ, ես նույնիսկ չեմ մտածել այդ մասին։ Ես երկար տարիներ է, ինչ ֆուտբոլում եմ ու գիտեմ, որ ամեն անգամ պետք է մի քայլ անես։ Ուստի թող Հայաստանի ժողովուրդը վայելի հաղթանակներն ու թույլ տա մեզ կենտրոնանալ մեր աշխատանքային մեթոդների վրա»,- եզրափակում է նա։
Պարզ երևում է, որ Կապառոսը հպարտ է Հայաստանի այս հավաքականով ու նրանց արած աշխատանքով, ուստի հետաքրքիր կլինի տեսնել՝ որքան հեռու նրանք կարող են գնալ միասին»։