Հայաստանի ազգային հավաքականի նախկին կիսապաշտպան Մարկոս Պիզելլին, ով կարիերայի ավարտից հետո տեղափոխվել է Բրազիլիա, ծավալուն հարցազրույց է տվել ArmSport-ին, որում խոսել է նաև Հայաստանի հավաքականի վերջին հաղթանակների ու ԱԱ-2022-ի եզրափակիչ դուրս գալու շանսերի մասին:
«Ամենակարևորն այն է, որ հավաքականն այսօր կախված չէ մեկ կամ երկու ֆուտբոլիստից, դրա համար այսօր Հայաստանի հավաքականը շատ ուժեղ է: Առաջ մենք ունեցել ենք տարբեր մակարդակի ֆուտբոլիստներ, ինչը զգացնել էր տալիս: Ես զգում եմ, որ բոլորը մեծ պատասխանատվությամբ են խաղում, այսինքն այնպես չէ, որ օրինակ Մխիթարյանը չկա, ուրեմն մեր հավաքականը չի կարող խաղալ, կամ Յուրա Մովսիսյանը չկա՝ ուրեմն չենք կարող խաղալ:
Այդ ժամանակներն իմ կարծիքով արդեն անցյալում են: Հիմա բոլորը զգում են, որ իրենք կարևոր են: Բոլորը բարձր մակարդակի ֆուտբոլ են խաղում: Կապ չունի՝ ով է մեկնարկային կազմում, կամ ով ինչ տարիքի է: Երբ մենք խաղում էինք, զգում էինք տարբերությունը մեր ու մրցակիցների, որ իրենք ունեն թոփ առաջնություններում ֆուտբոլիստ, իսկ մենք ոչ: Մենք տեսնում ենք Հենրիխ Մխիթարյանը ինչ է արել Հայաստանի հավաքականի համար ու որտեղ է հասել հիմա: Հիմա կրկնում եմ՝ բոլորը մեծ պատասխանատվությամբ են խաղում ու բարձր մակարդակի ֆուտբոլ են խաղում»,-ասաց Պիզելին:
Խոսելով Մունդիալ-2022-ի ընտրական փուլում Հայաստանի ազգային հավաքականի շանսերի մասին Հայաստանի հավաքականի նախկին հարձակվողն ասաց.
«Շատ դժվար է պատասխանել, բայց մեր հավաքականը կարող է խմբում գրավել 2-րդ տեղը: Իմ կարծիքով Գերմանիան շանս չի տա մյուս թիմերին ու առաջին տեղով դուրս կգա խմբից: Մեր հավաքականն այսօր պոտենցիալ ու որակ ունի, որ երկրորդ տեղի համար պայքարի Իսլանդիայի, Ռումինիայի ու մյուս թիմերի դեմ: Դրա համար մեծ հույս ունեմ, շատ եմ ուզում ու շատ եմ հավատում, որ մենք երկրորդ տեղում կավարտենք ընտրական փուլը»,-ասաց Մարկոս Պիզելին ArmSport-ի հետ զրույցում:
Բրազիլահայ ֆուտբոլիստի ամբողջական հարցազրույցը՝ շուտով:
Երվանդ ՀԱԿՈԲՅԱՆ
