Fenway Sports Group ամերիկյան ընկերությունը, որին պատկանում է անգլիական «Լիվերպուլը», 638 միլիոն եվրոյով վաճառել է ակումբի 10% բաժնեմասը: Այդ մասին հայտնում է The Times-ը:
Ըստ աղբյուրի, վերջին մեկ տարվա ընթացքում «Լիվերպուլը» կորցրել է մոտ 141 միլիոն եվրո, և այս գործարքը ակումբին հնարավորություն կտա շարունակել «Էնֆիլդի» վերակառուցումը, ինչպես նաև իրականացնել Յուրգեն Կլոպի թիմին աջակցելու համար ամառային տրանսֆերային պլանները:
RedBird Capital Partners մասնավոր բաժնետիրական ընկերության հետ համաձայնագիրը չի նշանակում, որ Կլոպին կտրամադրվի տրանսֆերային հսկայական բյուջե, բայց այն որոշակի շարունակականություն և կայունություն է առաջարկում «Լիվերպուլի» համար:
Հիշեցնենք, որ «Լիվերպուլը» Անգլիայի առաջնության մրցաշարային աղյուսակում յոթերորդն է ՝ 29 խաղում վաստակած 46 միավորով: