Ազատ ոճայինները ձեռնոց են նետել հունահռոմեականներին

Բուդապեշտ մեկնեցին Գևորգ Ղարիբյանը, Սլավիկ Գալստյանը, Արթուր Շահինյանն ու Դավիթ Օվասապյանը:

Ղարիբյանի ցանցում վիճակահանությունը լավն էր, սակայն քառորդ եզրափակչում սկզբունքային գոտեմարտում Ղարիբյանը պարտվեց ոչ այնքան անվանի ըմբիշ, ադրբեջանցի Մամադովին: Ղարիբյանին հաջողության շանսեր հնարավոր է սպասվում են Սոֆիայում, սակայն այնտեղ էլ չի բացառվում՝ կրկին հանդիպի Մամադովին, քանի որ վերջինս Բուդապեշտում չհասավ եզրափակիչ և ուղեգիր չնվաճեց: Սակայն այստեղ մեկ այլ հանգամանք ևս կա. Ղարիբյանի փոխարեն Սոֆիա կարող է մեկնել խոստումնալից Արմեն Մելիքյանը:

Թերևս, ամենամեծ սպասումները 67 կգ քաշային կարգում էր: Կարեն Ասլանյանը վնասվածք ուներ ու առանց պայքարի Բուդապեշտ մեկնեց Սլավիկ Գալստյանը: Մեկը մյուսի հետևից փայլուն գոտեմարտեր, ու Սլավիկը կիսաեզրափակչում է, որտեղ ուղեգիրը պետք է խաղարկեր վրացի երիտասարդ ըմբիշ Ռամազ Զոիձեի հետ: Ցավոք, Սլավիկը այդպես էլ «գորգ դուրս չեկավ» ու պարտվեց 1-10 հաշվով: Տպավորություն էր, որ նա չհասկացավ, թե երբ սկսվեց ու ավարտվեց գոտեմարտը: Եթե հաջորդ վարկանիշային մրցաշարին պատրաստ լինի Կարեն Ասլանյանը, միանշանակ, նա կմեկնի: Այս քաշային կարգում ոչ միայն ուղեգրի սպասելիքներն են շատ, այլ նաև մեդալային հույս ունենք, բայց, իհարկե, նախ Սոֆիայում, պետք է հասնել եզրափակիչ:

87 կգ քաշային կարգում, Մաքսիմ Մանուկյանի բացակայության պայմաններում մրցավայր մեկնեց Արթուր Շահինյանը: Արթուրը քառորդ եզրափակչում շատ հավասար պայքարում պարտվեց վրացի Լաշա Գոբաձեին, ով հետագայում նվաճեց օլիմպիական ուղեգիր. Արթուրին պակասեց վերջին գլորումը: Մեծ է հավանականությունը, որ Սոֆիա ևս կմեկնի Շահինյանը, քանի որ դժվար է պատկերացնել, որ Մանուկյանը կվերադառնա ու լավ մարզավիճակ կհավաքի մինչ վարկանիշային մրցաշարը:

130 կգ քաշային կարգում վիճակահանությունից հետո ակնկալիքներ գրեթե չկային: Դավիթ Օվասապյանը կիսաեզրափակչում կարող էր հանդիպել 2018․թ-ի աշխարհի չեմպիոն Սերգեյ Սեմյոնովի հետ, բայց Դավիթը պարտվեց քառորդ եզրափակչում ու չհանդիպեց Սեմյոնովին: Սոֆիայում Սեմյոնովն արդեն չի լինի ու Օվասապյանը կարող է հավակնել ուղեգրի, եթե կարողանա նույն սխալները թույլ չտալ ու պահել հաղթանակը: Հաղթանակը բաց թողնելու ամենացայտուն օրինակը աշխարհի անհատական գավաթի խաղարկությունում բրոնզե մեդալի համար գոտեմարտն էր, որտեղ հաղթանակը Դավիթը բաց թողեց սուլիչից 2-3 վայրկյան առաջ:

Դժվար է պատկերացնել, բայց մեր հունահռոմեականների հավաքականը կարող է մնալ 2 ուղեգրով, եթե այս մրցաշարից հետևություններ չանեն ու նույն սխալները թույլ տան:

Ազատ ոճայինները գերազանցեցին իրենք իրենց

Ի տարբերություն հունահռոմեականների, փայլուն ելույթ ունեցավ ազատ ոճայինների ընտրանին: 4 մասնակցից 2-ը հաղթող ճանաչվեց ու նվաճեց օլիմպիական ուղեգիր: Իհարկե, սպասելիքները մեծ էին Վազգեն Թևանյանից ու Արսեն Հարությունյանից, բայց այսչափ լավ ելույթ չէր կանխագուշակել նաև հավաքականի գլխավոր մարզիչ Հաբեթնակ Կուրղինյանը:

Շատ վստահ տեսք ուներ Արսեն Հարությունյանը: Երևում էր, որ երիտասարդ ըմբիշը հետևություններ էր արել աշխարհի անհատական գավաթի խաղարկության եզրափակչում թույլ տված սխալներից: Արսենը մեկը մյուսի հետևից հաղթանակներ տոնեց ու նվաճեց Օլիմպիական ուղեգիր: Հաղթեց նաև եզրափակչում ու կանգնեց պատվո հարթակի ամենաբարձր աստիճանին: Հարությունյանին արդեն իր քաշային կարգում դասում են ուժեղագույնների շարքին:

Նախ, վիճակահանությունը բավականին ծանր էր Վազգեն Թևանյանի պարագայում ու եզրափակիչ հասնելու համար նա պետք է հաղթեր օլիմպիական չեմպիոն Վլադիմիր Խինչիգաշվիլուն ու եվրոպայի ու աշխարհի առաջնությունների մրցանակակիր Մագոմեդմուրադ Գաջիևի նկատմամբ:

Հաղթանակները կայացան ու Վազգենը օլիմպիական ուղեգիր նվաճեց, սակայն այդքանով նրա պայքարը չավարտվեց: Եզրափակչում Վազգենի մրցակիցը Հաջի Ալիևն էր, ում հետ կապված պատմությունները չեն սահմանափակվում մրցագորգով:

Դեկտեմբերին կայացած աշխարհի անհատական գավաթի խաղարկությունում Վազգենն ու ադրբեջանցի Հաջի Ալիևը չհանդիպեցին միմյանց գորգում: Վազգենը դարձավ հաղթող, իսկ Ալիևը երրորդն էր, սակայն պարգևատրման ժամանակ չներկայացավ, ուղարկեց բժշկին, իսկ այն, ինչ Ալիևն անում էր Արցախյան պատերազմի օրերին՝  սոցցանցերը ողողելով հայ զինվորիների նկարներով ու բռնության կոչեր անելով, մեղմ ասած, հարիր չէր պրոֆեսիոնալ մարզիկին: Ճակատագրի հեգնանքով, 3 ամիս անց Վազգենն ու Ալիևը հանդիպեցին. փախուստ, այլևս, հնարավոր չէր: Թևանյանը 9-0 հաշվով չնկատեց աշխարհի ու եվրոպայի եռակի չեմպիոնին ու կրկին գրոհեց բարձունքը՝ ստորոտում թողնելով մրցակցին: Իսկ բուն գոտեմարտի ընթացքում Ալիևը փորձում էր աչքի ընկնել նաև ոչ սպորտային պահվածքով, սակայն երիտասարդ Թևանյանը իրեն պահեց իսկական պրոֆեսիոնալի պես ու չտրվեց սադրանքներին:

Արսենն ու Վազգենը իրենց քաշային կարգերում Տոկիոյում միանշանակ կհավակնեն մեդալների, այն էլ՝ ամենաբարձր հարկի: Նրանք այլևս «թաքնված ֆավորիտ» չեն կոչվի: Արդեն հիմա ըմբշամարտի աշխարը 21-ամյա ըմբիշների մասին խոսելիս, նշում է որպես քաշում առաջատարների թվին պատկանող ըմբիշներ:

74 և 86 կգ քաշային կարգերում հանդես եկան Հրայր Ալիխանյանն և Հովհաննես Մխիթարյանը: Մեր ըմբիշները պարտվեցին ապագա օլիմպիական ուղեգրերի տիրակալներին ու սա հույս է արթնացնում, որ հաջորդ մրցաշարում, եթե նրանք լինեն, կկարողանան պայքարել: Սոֆիա մեկնելու թեկնածուների թվում է նաև Արման Անդրեասյանը, որն աշխարհի անհատական գավաթի խաղարկությունում բրոնզե մեդալակիր դարձավ: Երիտասարդ ըմբիշը փոխել է քաշային կարգն ու դժվար է ասել՝ պատրաստ կլինի՞ մրցաշարին, թե ոչ:

Հավաքականի գլխավոր մարզիչ Հաբեթնակ Կուրղինյանն այսօր հայտնեց, որ Հաջիմուրադ Գացալովը վնասվածք ունի ու չի մասնակցի հաջորդ վարկանիշային մրցաշարին, իսկ Լևան Բերիանիձեն, ամենայն հավանականությամբ, կմեկնի Սոֆիա:

Առայժմ վաղ է խոսել հունահռոմեականների ճամբարում հնարավոր ճահճացման մասին, բայց ակնհայտ է, որ խնդիրներ կան: Ամեն ինչ այլ տեսք կստանա, եթե հաջորդ մրցաշարում կարողանան 1-2 ուղեգիր նվաճել:

Արմեն Գարամյան