«Վալենսիան» այս ամառ կարող է ունենալ ոչ միայն նոր գլխավոր մարզիչ (մանրամասներն՝ այստեղ), այլ նաև նոր սեփականատեր։ Վերջերս Ջոհորի արքայազնը (սուլթանություն Մալայզիայում)՝ Տունկու Իսմայիլը, հաստատել է, որ կարող է ձեռք բերել իսպանական «Վալենսիան»: Այս մասին նա հայտարարել է Instagram-ում օգտատերերի հետ զրույցի ընթացքում:
«Այո, ես խոսեցի «Վալենսիայի» սեփականատիրոջ հետ ակումբի բաժնետոմսերի մի մասը գնելու մասին: Բայց բանակցությունները դադարեցվել են՝ մի շարք խնդիրների պատճառով»,- գրել էր արքայազնը:
🦇 Քաոս՝ չղջիկներ քարանձավում
Այն, որ «Վալենսիան» այժմ դժվար օրեր է ապրում, ոչ ոքի համար գաղտինք չէ։ Իսպանական ֆուտբոլի երբեմնի ամենահաջողակ թիմերից մեկն այսօր եվրագավաթներում պայքար մղելու փոխարեն փորձում է դուրս գալ Լա Լիգայի «նկուղից»։
2018/19 մրցաշրջանը հույսի վերջին առկայծումն էր: Իսպանիայի գավաթը նվաճելուց հետո ակումբը, սինգապուրցի սեփականատեր Պիտեր Լիմի գլխավորությամբ, հրաժեշտ տվեց գլխավոր մարզիչ Մարսելինոյին և այդ թիմի թերևս ամենակարևոր կերպարին՝ սպորտային տնօրեն Մատեու Ալեմանիին: Ասիացի ներդրողների գլխավորությամբ ակումբն ընկղմվեց պարտքերի մեջ, թիմից հեռացան մի շարք առաջատարներ՝ Պարեխո, Կոկելին, Ռոդրիգո, իսկ երկրպագուները սկսեցին զանգվածաբար դուրս գալ փողոց ու բազմաթիվ ակցիաներ կազմակերպել:
Լիմը, ինչպես ասում են իսպանական լրատվամիջոցները, պատրաստ է վաճառել վերահսկիչ փաթեթը 400 միլիոն եվրոյով, իսկ գնորդները բավական շատ են, բայց հիմնական ֆավորիտը հենց այսօրվա մեր հերոսն է․ Տունկու Իսմայիլ իբնի Սուլթան Իբրահիմ ՝ Ջոհորի իշխանը (Մալայզիայի 13 նահանգներից մեկը), ով պատրաստվում է չղջիկների միջոցով նվաճել եվրոպական ֆուտբոլը:
Ռոնալդուի ընկեր Արքայազնը
36-ամյա Տունկու Իսմայիլը սուլթան Իբրահիմ Իսկանդարի հինգ երեխաներից ամենամեծն է, ում կարողությունը գնահատվում է մոտ 750 միլիոն եվրո, ըստ Forbes-ի: Նա գահի հետ միասին ժառանգելու է ընտանեկան ամբողջ հարստությունը:
Չնայած Լիմը մինչ այժմ խուսափում էր ակումբի վաճառքի վերաբերյալ հարցերից, նրա հավանական հետնորդն արդեն մի քանի հրապարակային հայտարարություն է արել. «Ես իշխան եմ, ոչ թե գործարար: Փողն ինձ չի հետաքրքրում, շատ ավելի արժեքավոր է հետք թողել պատմության մեջ։ Գաղտնիք չէ, որ ես հիանում եմ ֆուտբոլով», — ասում է Տունկուն, ով նաև Մալայզիայի ֆուտբոլի Սուպերլիգայի չեմպիոն «Ջոհորի» սեփականատերն է:
«Ես նորեկ չեմ ֆուտբոլում: Ես լուրջ ակումբ եմ ստեղծել, ութ տարվա ընթացքում մենք նվաճեցինք 16 տիտղոս, լինելով Հարավարևելյան Ասիայի ամենահաջողակ թիմերից մեկը: Ես ուզում եմ ընդլայնել իմ կայսրությունը, նոր մարտահրավերներ ստանալ:
Ես ձեր ակումբի խորհրդանիշները կամ ավանդույթները փոխողը չեմ: Ես այստեղ եմ փառքի համար: Ի՞նչ է պետք «Վալենսիային»: Մարդ, ով ներսից գիտի ֆուտբոլը, հաջողությունների հասնելու քաղց ունի և գիտակցում է «Վալենսիայի» մեծությունը: Առաջին հերթին մենք պետք է պրոֆեսիոնալներով թիմ կազմենք»,- ասել է արքայազնը, ով, ըստ միջազգային մամուլի, Կրիշիտիանու Ռոնալդուի հետ մտերիմ և լավ ընկերներ են:
Արքայազն ու սինգապուրցի միլիարդատերը
Բայց կա մի մարդ, ում հետ արքայազն ավելի մտերիմ է։ Դա «Վալենսիայի» ներկայիս սեփականատեր Պիտեր Լիմն է։ Տունկու Իսմայիլը իր երկրի ֆուտբոլի ֆեդերացիայի ղեկավարն է: Այս պաշտոնում նա նախաձեռնեց կառուցել շքեղ մարզադաշտ 40,000 հանդիսատեսի համար, որի արժեքը կազմում է շուրջ 200 միլիոն եվրո: Սա «Ջոհորի» տնային ասպարեզն է, որի կազմում կարիերան հետագայում շարունակեց «Վալենսիայի» նախկին աստղ Պաբլո Այմարը: Արգենտինացին «Հարավային վագրի» կազմում 8 խաղ անցկացնելու համար վաստակել է մի քանի միլիոն եվրո:
Այժմ Պիտեր Լիմը ակումբի համար պատահական գնորդ չի ընտրել: Նրանք հիանալի ընկերներ են, միասին նշում են ծննդյան օրը, երեկույթներ կազմակերպում իրենց երեխաների համար, շատ ժամանակ են անցկացնում միասին։ Բացի այդ, երկուսն էլ ընկերներ են Կրիշտիանու Ռոնալդուի հետ, որի մասին վերևում արդեն նշել ենք: 2016-ի ամռանը «Վալենսիայի» մի քանի խաղացողներ (Մինա, Չավի Ֆուեգո, Ալկասեր, Ռայան) արքայազնի ակումբի խաղացողների հետ միասին մարզվեցին Վագրերի բազայում: Նրանք զարմացած էին մնացել մարզական համալիրով․ արհեստական խոտածածկով 11 խաղադաշտեր, փակ տանիք, օդի ջերմաստիճանն ու խոնավությունը վերահսկվում են ժամանակակից սարքավորումների միջոցով, և թիմը ոչ մի անհարմարություն չի զգում նույնիսկ 35 աստիճանի ջերմության պայմաններում:
Շքեղը գնահատող արքայազնը
Մալազիացի արքայազնին առաջին անգամ նկատել են Մեստալյայում («Վալենսիայի» մարզադաշտը) դեռ 2016-ին, բայց այն ժամանակ իսպանական մամուլը ավելի շատ քննարկում էր մեծահարուստ իշխանի ոսկե ինքնաթիռը`ավելի քան 90 միլիոն եվրո արժողությամբ Boeing 737-ը: Օդանավը կարող է տեղավորել 30 ուղևոր, որտեղ կան մի քանի խոհանոցներ, հյուրասենյակներ և լոգարաններ:
Այնուամենայնիվ, սա նրա միակ գանձը չէ: Նրան է պատկանում Ֆլինսթոուն շքեղ կալվածքը, որը գտնվում է Ջոհոր Բարհոմից 130 կմ հեռավորության վրա՝ դեպի ծով նայող, ինը հարկանի շինություն՝ 17 սենյակներով (ներառյալ երկու կայսերական սենյակ), որը սպասարկող անձնակազմը նրան միշտ դիմավորում է ռազմական ողջույնով: Զենքն ու ռազմական կարգապահությունը ևս մեկ մեծ կիրք են արքայազնի համար: Իսկ նրա ավտոտնակը․․․ ոչ, ներողություն՝ ավտոպարկը, ներառում է 300 շքեղ ավտոմեքենա՝ ներառյալ Mercedes, Rolls-Royce, Bentley, Aston Martin, Lamborghini և BMW:
«Վալենսիան» կդառնա՞ ասիացի մեկ այլ հարուստ մարդու խաղալիքը, թե՞ առասպելական փյունիկի նման կրկին նոր սկիզբ կառնի, մենք դա կիմանանք շատ շուտով․․․