«Նախորդ տարի բյուջեով նախատեսված է եղել գումար հատկացնել Արթուր Ալեքսանյանի անվան մարզադպրոցը կառուցելու համար, բայց աշխատանքները ձգձգվեցին, նախահաշվարկային գծագրերը մինչև հաստատվեցին, փուլերով անցան՝ արդեն տարին վերջացավ ու նախատեսված 2 մլրդը չօգտագործվեց ու վերադարձվեց բյուջե»,-այս մասին ArmSport-ի հետ զրույցում ասում է հունահռոմեական ոճի ըմբշամարտի Հայաստանի հավաքականի մարզիչ, աշխարհի եռակի ու Եվրոպայի հնգակի, Օլիմպիական չեմպիոն Արթուր Ալեքսանյանի հայրը՝ Գևորգ Ալեքսանյանը:
Գյումրիի հունահռոմեական ըմբշամարտի մարզադպրոցը, որը տարիներ շարունակ գտնվում է անմխիթար վիճակում, 2015-ին վերանվանվեց աշխարհի չեմպիոն Արթուր Ալեքսանյանի անունով:
2019-ին հայտնի դարձավ, որ Օլիմպիական չեմպիոն Արթուր Ալեքսանյանի պատվին կկառուցվի նոր մարզադպրոց, որը նախատեսված կլինի ոչ միայն ըմբշամարտի, այլև տարբեր մարզաձևերի համար:
«Նոր տարածքի վրա կառուցվելու է ոչ թե մարզադպրոց, այլ կարելի է ասել՝ մեծ սպորտային բազա: Տարածքը, որը տրամարդվել է մեր քաղաքապետարանի կողմից, 10 հեկտար է: Դրա վրա կառուցվելու է մրցումային մեծ դահլիճ՝ 1100 նստատեղով, կառուցվելու է մարզումային մեծ դահլիճ՝ 6 ըմբշամարտի գորգի չափով, ծանրամարտի դահլիճ, մարզասարքերի դահլիճ, հետո առանձին նաև հյուրանոցային մաս՝ 112 համարով, որտեղ հնարավոր կլինի տեղավորել շուրջ 200 մարզիկ: Լինելու են ժամանցի համար սենյակներ, որտեղ կարելի է սեղանի խաղեր կազմակերպել՝ թենիս, բիլիարդ: Լինելու է փոքր սրճարան, սաունա: Հյուրանոցն ամեն ինչ պետք է ունենա, որ մարզիկները հավաքների ժամանակ զբաղմունք ունենան»-մանրամասնում է Գևորգ Ալեքսանյանը:
Նրա խոսքով մարզահամալիրում կառուցվելու է նաև մեծ մարզադաշտ՝ միջազգային ստանդարտներին համապատասխան: Ունենալու է 8 շրջանային վազքուղի, նաև կրոսի համար տարածք, մեքենաների կայանատեղի: Եթե լրացուցիչ գումար հատկացնեն՝ հնարավոր է նաև մեծ լողավազան կառուցվի:
Գծագրական աշխատանքներն արդեն ավարտվել են: Տենդերից հետո գծագրական աշխատանքները մեկնարկել էին 2019 թվականի դեկտեմբերին և հաջողվեց ավարտին հասցնել միայն 2020-ի վերջին: Հասկանալի պատճառներով՝ դպրոցի շինարարության մեկնարկը հնարավոր չդարձավ 2020-ին։ Նկատենք, որ եթե անցյալ տարվա պետբյուջեով կառուցման համար հատկացված էր մոտ 2 մլրդ․ դրամ գումար, ապա այս տարի բյուջեով առանձին տող նախատեսված չէ։ Ինչը, սակայն, ԿԳՄՍ նախարարությունից վստահեցնում են, որ չի փոխելու և չի խանգարելու շինարարության մեկնարկին, և այն նախարարության համար առաջնահերթության ծրագրերի մեջ է։
ՀՀ ԿԳՄՍ նախարարության Հասարակայնության հետ կապերի և տեղեկատվության վարչությունից ArmSport-ին տեղեկացնում են, որ նախարարությունը մշակել է Կառավարության որոշման նախագիծ, որով նախատեսվում է շուրջ 500 մլն դրամ փոխանցել՝ շինարարական աշխատանքներն այս տարի սկսելու նպատակով: ԿԳՄՍ նախարարությունը որոշման նախագիծն արդեն իսկ ուղարկել է Կառավարություն: Որոշման նախագծով չի նախատեսվում գումարը հատկացնել պահուստային ֆոնդից, այն հատկացվելու է ծրագրերի վերաբաշխման արդյունքում:
Հավաքականի մարզչի խոսքով գումարը փոխանցվելու է փուլերով. «Այն, ինչ թվարկեցի, դա ավարտելու համար ժամկետը տրված է 2 ու կես տարի: Եթե ֆինանսավորումը չուշանա, երկուսուկես տարում պետք է արդեն շինարարությունն ավարտված լինի: Այս տարի այդ 500 մլն․-ը նախատեսված է: Չգիտեմ, նախապես ոչինչ չեմ կարող ասել, թե ինչ կլինի հետագայում: Այսօր ծանր է վիճակը, չգիտեմ ոնց կլինի հետո»։
Երվանդ ՀԱԿՈԲՅԱՆ