Կորոնավիրուսը շարունակում է թևածել մարզաշխարհում: Հետաձգվել են գրեթե բոլոր միջազգային սպորտային իրադարձությունները: Այնպես է ստացվել, որ շատերը՝ ինչ-որ տեղ նաև ճարահատյալ, հետևում են Ռուսաստանի առաջնության բոլոր խաղերին: Մոսկվայի քաղաքապետարանը երեկ արգելեց մարզական միջոցառումների անցկացումը՝ Մոսկվայում: Դա նշանակում է, որ մոսկովյան ֆուտբոլային խաղերը ևս չեղարկվում են: Սակայն պարզից էլ պարզ է, որ ՌՊԼ-ի դադարեցումն ընդամենը ժամերի հարց է:
Ֆուտբոլային աշխարհի ուշադրության կենտրոնում, այսօր, ՈՒԵՖԱ-ի կազմակերպած արտահերթ օնլայն կոնֆերանսն է, որին մասնակցելու են ՈՒԵՖԱ-ի անդամ 55 ասոցիացիաների ղեկավարներն ու ՈՒԵՖԱ-ի ղեկավար կազմը: Ճիշտ է, դժվար է պատկերացնել, թե օնլայն հարթակում այդքան ղեկավար ինչպես է շփվելու ու գալու ընդհանուր հայտարարի, բայց ամեն դեպքում իրադարձությանը սպասում են բոլորը:
Կոնֆերանսում քննարկվելու է ՈՒԵՖԱ-ի հովանու ներքո անցկացվող միջոցառումների կայացման ժամանակացույցը: Պարզ կդառնա, թե ինչ ճակատագիր կունենա այդքան սպասված ԵՎՐՈ-2020-ը: Ֆրանսիական հեղինակավոր կայքերից մեկը պնդում է, որ ՈՒԵՖԱ-ն կհայտարարի ԵՎՐՈ-Ն՝ մեկ տարով հետաձգելու մասին: Բրիտանիայում վստահ են, որ կարելի է առաջնությունն անցկացնել սույն թվականի դեկտեմբերին, իսկ մինչ այդ կավարտվեն ներքին առաջնությունները: Իհարկե, հասկանալի է, որ սրանք պարզապես ենթադրություններ են կամ ուղղակի ցանկություն, սակայն ակնառու է, որ իրականությունից հեռու չենք:
Կքննարկվի նաև ՈՒԵՖԱ-ի ՉԼ-ի ու ԵԼ-ի մրցաշարերի հարցը: Հիշեցնենք, որ նախորդ շաբաթ 2 մրցաշարում էլ մեկնարկեց 1/8 եզրափակիչը: ՉԼ-ում նախատեսված 4 խաղերն էլ կայացան, իսկ Եվրոպա լիգայում նախատեսված 8 խաղերից կայացավ 6-ը: ՈՒԵՖԱ-ն նույնիսկ խնդրեց «Ինտերին» ու «Ռոմային» լքել մրցաշարը, ինչը, իհարկե, չընդունվեց ակումբների կողմից: Այս շաբաթ ՉԼ-ում նախատեսված և ոչ մի խաղ չկայացավ, նույնը՝ ԵԼ-ում:
Մ-17, Մ-19, Մ-21 հավաքականների մասնակցությամբ մրցաշարերի և ազգային հավաքականների մասնակցությամբ ընկերական խաղերի ճակատագիրը ևս հայտնի կդառնա այսօր:
Մի խոսքով, այսօր Եվրոպական ֆուտբոլում կարևորագույն օր է: Մի բան փաստ է, որ առաջնայինը բոլորի առողջությունն է, իսկ ֆուտբոլը ոմանց հոբբին է, ոմանց՝ աշխատանքը, ոմանց էլ՝ կյանքի իմաստը, բայց այն կյանք չի կարող արժենալ:
ՈՒԵՖԱ-ի կայացրած ցանկացած որոշում ընդունելի կլինի:
Արմեն Գարամյան
