«Վերջին օրերին մեսիջներ եմ ստանում, որ ռեկտորի ընտրություններից առաջ փորձ է արվելու փոխել հոգաբարձուների խորհրդի կազմը: Հուսով եմ, որ այս ինֆորմացիան սխալ է, և տա Աստված, որ ինձ սխալ ինֆորմացիա հասած լինի»,-այս մասին ArmSport-ին տված հարցարույցի ընթացքում ասաց Հայաստանի Ֆիզիկական կուլտուրայի և սպորտի պետական ինստիտուտի պրոռեկտոր, ռեկտորի թեկնածու Գագիկ Սարգսյանը:
Գալիք տարվա հունվարի 11-ին տեղի է ունենալու Հայաստանի Ֆիզիկական կուլտուրայի և սպորտի պետական ինստիտուտի ռեկտորի ընտրությունը, որին առաջադրվել է նաև ՀՖԿՍՊԻ պրոռեկտոր, Հայաստանի դահուկային սպորտի ֆեդերացիայի գլխավոր քարտուղար Գագիկ Սարգսյանը: Վերջինս ռեկտորի պաշտոնում ընտրվելու համար պայքարելու է ռեկտորի ժամանակավոր պաշտոնակատար Դավիթ Խիթարյանի հետ:
«Ընտրությունների հետ կապված գործընթացն ընթացքի մեջ է: Ես արտահայտվել էի, որ ակնկալում եմ տղամարդկային պայքար, դե Պարոն Խիթարյանը նույնպես ողջունեց դա: Սակայն, ինչ-որ մեսիջներ եմ ստանում վերջին օրերին, որ փորձ է արվելու հոգաբարձուների խորհրդի կազմ փոխել և այլն: Նախ՝ ինձ սկզբում զարմացրեց շտապողականությունը՝ հունվարի 11-ին, շատ արագ ընտրություններ անցկացնելու որոշումը: Ես ինքս նոր էի վերադարձել ռազմաճակատից և ինձ համար անակնկալ էր, բայց պատրաստ էի, որովհետև այս որոշումը կայացրել եմ դեռևս 1994 թվականին՝ ինստիտուտ ընդունվելուց: Սա իմ օջախն է, ես այստեղ մեծացել եմ: Ուղղակի մեսիջ ստացա, որ փորձում են ինչ-որ հոգաբարձուների խորհրդի կազմ փոխել և այլն: Շատ տարօրինակ էր, ինչ-որ տեղ նաև անհասկանալի, քանի որ շատ անհեռանակար ու վտանգավոր քայլ է, եթե որոշեն նման բան անել: Ընդամենը ասում եմ՝ մեսիջ եմ ստացել, և չեմ ցանկանում հավատալ դրան, որ փորձում են հոգաբարձուների խորհրդի կազմ փոխել, քանի որ շատ ժամանակավրեպ կլինի, նաև վտանգավոր հետևանքներով: Տա Աստված՝ ես սխալված լինեմ, վերջ ի վերջո ընտրությունների պետք է գնալ շատ հաստատուն և առանց մեծ փոփոխությունների փորձերով՝ այս կամ այն կերպ ընտրությունների վրա ազդելով: Հուսով եմ, որ այդ ինֆորմացիան սխալ է, և հավատացած եմ, որ սխալ է, քանի որ դա կլինի ուղղակի անհեռատեսություն: Այսինքն եթե փոփոխություններ պետք է անեն, ուղղակի պետք է հասկանալ թե ինչու և ինչու հենց հիմա: Այսինքն եթե նման բան կա, փորձում եմ նպատակը հասկանալ»,-ասաց Սարգսյանը:
