Հայաստանի դահուկային սպորտի ֆեդերացիայի նախագահ Գագիկ Սարգսյանը հայտարարել է զբաղեցրած պաշտոնից հեռանալու մասին։ Որոշումը կայացվել է վերջին շրջանում ծավալված իրադարձությունների և ԿԳՄՍ նախարարության հետ ունեցած տարաձայնությունների ֆոնին։ Այս մասին տեղեկացնում է «Ազատություն ռադիոկայանը»։
Սարգսյանն իր տեսաուղերձում նշել է, որ դահուկային սպորտը չի կարող զարգանալ առանց պետական աջակցության՝ հավելելով, որ գուցե հենց իր անձն է այն պատճառներից մեկը, որ պետական կառույցները չեն ցանկանում ուշադրություն դարձնել այս մարզաձևին։ Վերջերս նա կոշտ քննադատության էր ենթարկել ԿԳՄՍ նախարարությանը՝ պնդելով, որ դահուկային սպորտը մատնված է անուշադրության։
Հրաժարականին նախորդել էր Իտալիայում կայացած մրցաշարի ժամանակ տեղի ունեցած միջադեպը, երբ դահուկորդ Միքայել Միքայելյանը կպչուն ժապավենով փակել էր մարզահագուստի վրա առկա «Ադրբեջան» գրառումը (գովազդը)։ Ֆեդերացիայի նախագահն իր աջակցությունն էր հայտնել մարզիկին, ինչին հետևել էր նամակագրություն նախարարության հետ։ Գերատեսչությունը պարզաբանում էր պահանջել արարքի վերաբերյալ, ինչին Սարգսյանը կարճ պատասխանել էր, որ քայլն առավել քան պարզ է և մեկնաբանման կարիք չունի։
Միջադեպից մեկ շաբաթ անց ԿԳՄՍ նախարար Ժաննա Անդրեասյանը հանդես էր եկել հայտարարությամբ՝ ընդգծելով, որ սպորտը պետք է զերծ մնա քաղաքականությունից․
«Սպորտը պետք է լինի սպորտի մասին, և կարևոր է, որ մենք մարզական հրապարակում մրցման ժամանակ հնարավորինս հետևենք արդար, ազնիվ սպորտի բոլոր կանոններին»,- նշել էր նախարարը։
