«Փյունիկ» ՖԱ-ի գլխավոր տնօրեն Հայկ Ղազազյանը ֆեյսբուքյան իր էջում գրառում է կատարել`անդրադառնալով ՀՖՖ-ի կողմից Արսեն Աղաջանյանի թեկնածությունը նախագահի պաշտոնում չընդունելուն:
Հիշեցնենք` ՀՖՖ-ն ավելի վաղ ներկայացրել էր Արսեն Աղաջանյանի կենսագրությունը և նրա թեկնածության մերժման համար հիմք հանդիսացած փաստաթուղթը՝ Կիպրոսի ֆուտբոլի ֆեդերացիայից ստացված պաշտոնական գրությունը, որը ևս հրապարակել էր՝ հաշվի առնելով հանրային մեծ հետաքրքրությունը:
«Այսօր ՀՖՖ-ն հրապարակեց Կիպրոսի Ֆուտբոլի Ֆեդերացիայի պաշտոնյայի պատասխանը Արսեն Աղաջանյանի գործունեության վերաբերյալ: Այդ գրությունը, ինչպես նաև ՀՖՖ սկզբնական հարցումը, երկու օր առաջ տրամադրվել է նաև «Փյունիկին», ինչը ողջունելի է: Այս փաստաթղթերի կապակցությամբ կցանկանայի կատարել որոշ արձանագրումներ: Միանգամից նշեմ, որ գրածս որևէ կերպ ոչ մի թեկնածուի քարոզի կամ հակաքարոզի նպատակ չի հետապնդում, այլ ընդամենը բարձրաձայնում է այն խնդիրները, որոնք մենք տեսնում ենք տվյալ ընտրական գործընթացներում և ՀՖՖ կայացրած որոշման մեջ: Եվ այսպես՝
1. Փաստաթղթում նշվում է ընդամենը, որ Արսեն Աղաջանյանը չի իրականացրել որևէ ֆուտբոլային գործունեություն, որը կապված կլիներ Կիպրոսի Ֆուտբոլի Ֆեդերացիայի հետ: Արդեն նույնիսկ իրավաբանությունից հեռու մարդիկ տեղյակ են, որ ՀՖՖ կանոնադրությունը չի պահանջում, որպեսզի անհրաժեշտ ֆուտբոլային գործունեությունը որևէ կապ ունենա տվյալ երկրի ֆուտբոլի ֆեդերացիայի հետ: Նման պահանջ մեծագույն ցանկության դեպքում էլ անհնար է գտնել ՀՖՖ կանոնադրությունում:
Այն, որ ֆուտբոլային գործունեության պահանջը բավարարելու համար պարտադիր չէ ծավալել գործունեություն ֆուտբոլի ֆեդերացիայի հովանու ներքո պարզ է դառնում, երբ ուսումնասիրում ենք ընդունված ՀՖՖ նախագահի կամ գործկոմի թեկնածուների կենսագրությունները: Այնտեղ բազմաթիվ օրինակներ կան, երբ գործունեությունը վերաբերել է ֆուտբոլին, սակայն ֆեդերացիայի հետ որևէ կապ չի ունեցել: Հեռու չգնալու համար, կարող եք սկսել իմ կենսագրությունից:
2.Մեր տրամադրության տակ է նաև ՀՖՖ սկզբնական հարցումը Կիպրոսի Ֆեդերացիային: Այն ուղղված է Կիպրոսի Ֆեդերացիայի գլխավոր քարտուղար Ֆիվոս Վակիսին: Սակայն գրությանը պատասխանում է այլ անձ, որի պաշտոնն է գլխավոր մենեջեր: Արդյոք այդ անձը ունի անհրաժեշտ լիազորություններ պատշտոնական գրություններ տալ Կիպրոսի Ֆուտբոլի Ֆեդերացիայի անունից, և ինչու գրությանը չի պատասխանել հասցեատեր՝ գլխավոր քարտուղարը, մեզ հայտնի չէ:
3.Կրկին անգամ ուզում ենք շեշտադրել, որ ընտրական պրոցեսների նկատմամբ վստահության ամենակարևոր գրավականներից է այդ պրոցեսը կազմակերպողների անկախությունը թե ձևական, թե բովանդակային առումով։ Իսկ երբ մեկ թեկնածու ստորագրում է հարցում մյուս թեկնածուի վերաբերյալ, կարծում եմ այդ անկախությունը կարող է հարցեր առաջացնել»:
Հիշեցնենք` ՀՖՖ Գործկոմի անդամության համար «Փյունիկի» կողմից առաջադրվել է հենց Հայկ Ղազազյանի թեկնածությունը, որն ընդունվել է ֆուտբոլի ֆեդերացիայի կողմից: