Լեոնել Մեսսին ֆենոմենալ ֆուտբոլիստ է և արդեն ամրագրել է իր տեղը համաշխարհային ֆուտբոլի պատմության մեջ, որպես լավագույն ֆուտբոլիստներից մեկը: Մեսսիին են ենթարկվել բազում ռեկորդներ, իսկ դեկտեմբերի 2-ին գրանցվեց հերթականը ՝ 6-րդ «Ոսկե գնդակը»։
Ներկայացնում ենք այն ռեկորդները, որոնք դեռ չի գերազանցել Լեոնել Մեսսին, սակայն մոտ ապագայում չի բացառվում, որ դրանք ևս կգրանցվեն լեգենդար արգենտինացու ակտիվում:
16 տարի անընդմեջ գոլ Չեմպիոնների լիգայում — Ռեկորդը պատկանում է «Մանչեսթեր Յունայթեդի» նախկին լեգենդար ֆուտբոլիստ Ռայան Գիգզին: Այս ռեկորդին հասնելու համար Մեսսիին անհրաժեշտ է ևս մեկ մրցաշրջան «Բարսելոնայում» անցկացնել, իսկ 2021-2022թ-ի հանդես գալու և գոլ հեղինակելու դեպքում Մեսսին կգերացանցի լեգենդար ուելսցու ցուցանիշը:
Անցկացրած հանդիպումները «Բարսելոնայի» կազմում — Այս ցուցանիշով ռեկորդակիրը Խավի Էրնանդեսն է՝ 767 հանդիպում: Մեսսիի ակտիվում 701 հանդիպում է կատալոնացիների կազմում, և Խավիի ցուցանիշին հասնելու համար անհրաժեշտ է մոտ երկու մրցաշրջան ևս անցկացնել կատալոնյան ակումբում:
Ամենաշատ մրցանակ նվաճած ֆուտբոլիստը մեկ թիմի կազմում — Կրկին այս ցուցանիշով լավագույնն է Ռայան Գիգզը` 36 մրցանակ: Այս ֆանտաստիկ ցուցանիշին հասնելու համար Լեոյին անհրաժեշտ է ևս երկու թիմային մրցանակ նվաճել «Բարսայի» կազմում:
Լավագույն ռմբարկու մեկ թիմի կազմում — Այս ցուցանիշի տիրակալն է լեգենդար Պելեն, ով բրազիլական «Սանթոսի» կազմում կարողացել է աչքի ընկնել 643 անգամ: Մեսսին «Բարսելոնայի» կազմում աչքի է ընկել 614 անգամ, և նրան անհրաժեշտ է ևս 30 գոլ և Պելեի ռեկորդը արդեն անցյալում է:
Արգենտինայի հավաքականի կազմում ամենաշատ հանդիպումներ անցկացրած ֆուտբոլիստ — Ռեկորդակիրը Խավիեր Մասկերանոն է, ով Արգենտինայի ընտրանու կազմում անցկացրել է 147 հանդիպում, իսկ լեգենդար Մեսսին` 138 հանդիպում: Եվս 10 խաղ և Մեսսին կգերանզանցի Մասկերանոյի ռեկորդը:
Ամենաշատը «Էլ-Կլասիկո» անցկացրած ֆուտբոլիստը — Այս ցուցանիշը գերազանցելու համար հաջող հանդես գալու դեպքում Մեսսիին կարող է բավարար լինել նաև ընթացիկ մրցաշրջանը: Մադրիդի «Ռեալի» ֆուտբոլիստ Մանոլո Սանչիսը անցկացրել է 43 «Էլ Կլասիկո», իսկ Մեսսին`41:
Չեմպիոնների լիգայի բոլոր ժամանակների լավագույն ռմբարկու — Այս ռեկորդին հասնելու համար Մեսսին պետք է գերազանցի իր գլխավոր «մրցակից» Կրիշտիանու Ռոնալդուի ցուցանիշը` 127 գոլ: «Բարսելոնայի» առաջատարի ակտիվում 114 գոլ է և դժվար է հավատալ, որ նա կկարողանա առաջ անցնել Ռոնիից, սակայն Մեսսիի համար չկան ֆուտբոլում անհնարին թվեր և ռեկորդներ:
Մոլորակի ամենաշատ մրցանակ նվաճած ֆուտբոլիստ — Այս ցուցանիշով առաջատարը «Բարսելոնայի » նախկին ֆուտբոլիստ լեգենդար Դանի Ալվեսն է` 40 մրցանակ, իսկ Մեսսիի ակտիվում 34 մրցանակ է։ Այս ցուցանիշով անհավանական է թվում, որ Մեսսին կկարողանա գերազանցել բրազիլացուն, սակայն նորին գերազանցություն ֆուտբոլում ամեն ինչ հնարավոր է:
Չեմպիոնների լիգայի մեկ մրցաշարում ամենաշատ գոլ հեղինակած ֆուտբոլիստ — Այս ռեկորդի տիրակալը կրկին Կրիշտիանու Ռոնալդուն է, ով 2013/2014թ-ի մրցաշրջանում կարողացել է իր ակտիվում գրանցել 17 գոլ: Մեսսին լավագույն արդյունքը գրանցել է 2011/2012թ-ի մրցաշրջանում` աչքի ընկնելով 14 անգամ:
Բարսելոնայի կազմում Չեմպիոնների լիգան ամենաշատը հաղթած ֆուտբոլիստ — Այս ցուցանիշով Մեսսին լավագույնն է, սակայն նրան հավասար քանակությամբ հետապնդում են Խավին և Ինիեստան։ Որպեսզի Մեսսին միանձյա ռեկորդակիր հռչակվի, պետք է նվաճել Չեմպիոնների լիգայի ևս մեկ չեմպիոնական տիտղոս:
