Vbet Հայաստանի Պրեմիեր լիգայի 2-րդ տուրում Ալեքսանդր Գրիգորյանի գլխավորած թիմի ֆուտբոլիստները Վազգեն Սարգսյանի անվան «Հանրապետական» մարզադաշտում կհյուրընկալվեն «Փյունիկին»։ Հանդիպումը կկայանա օգոստոսի 23-ին և կմեկնարկի 19։30-ին։
Առաջին տուրի՝ «Լոռիի» հետ խաղը, ինչպես հայտնի է, չկայացավ, և «Ուրարտուն» ահա այսպես է ազդարարել Պրեմիեր-լիգայում իրենց մեկնարկը.
«Ուրարտուի» մամուլի քարտուղարությունն առանձնացրել է ամենահետաքրքիրը սպասվող դիմակայության մասին։
ՎԻՃԱԿԱԳՐՈՒԹՅՈՒՆ
Թիմերը միմյանց հետ մրցել են 82 անգամ։ «Փյունիկը» հաղթել է 43, «Ուրարտուն»՝ 22 անգամ։ 17 խաղ ավարտվել է ոչ-ոքի։ Կայացած 82 հանդիպումներում 224 գոլ է խփվել։ Այս դիմակայությունում լավագույն ռմբարկուն Գևորգ Ղազարյանն է, որն աչքի է ընկել 8 անգամ։ «Ուրարտուի» կազմում «Փյունիկի» դարպասն ամենից շատը գրավել են Արամ Հակոբյանն ու Սամվել Մելքոնյանը՝ 6-ական անգամ։ Թիմերի միջև կայացած վերջին 5 խաղերում «Ուրարտուն» հաղթել է 3 անգամ և կրել 2 պարտություն։ Ուշագրավ է, որ բոլոր 3 հաղթանակներն էլ «Ուրարտուի» ֆուտբոլիստները տոնել են մրցակցի հարկի տակ։
ՎեՐՋԻՆ ԱՆԳԱՄ
Թիմերը վերջին անգամ միմյանց հետ հանդիպել են 2020 թվականի հունիսի 28-ին։ Հայաստանի Բարձրագույն խմբի առաջնության 25-րդ տուրում «Փյունիկը» նվազագույն հաշվով առավելության հասավ։ Միակ գնդակը հեղինակեց Ժոզեֆ Ադահը։
300-ԻՆ ԸՆԴԱՌԱՋ
«Ուրարտուն» շատ մոտ է հերթական պատմական ցուցանիշը գրանցելուն։ Եթե առաջիկա խաղում Ալեքսանդր Գրիգորյանի գլխավորած թիմի ֆուտբոլիստները կարողանան հաղթանակի հասնել, ապա դա կլինի «Ուրարտուի» 300-րդ հաղթանակը Հայաստանի Բարձրագույն խմբի առաջնություններում։ Նոր ցուցանիշ կարող է գրանցել նաև Ջոնել Դեսիրեն։ Եթե հայիթցի ֆուտբոլիստը կարողանա աչքի ընկնել, ապա կխփի իր 30-րդ գոլը Հայաստանի Բարձրագույն խմբի առաջնություններում։
«ՈՒՐԱՐՏՈՒԻ» ՍԱՆ ԱՐՏԱԿ ՕՍԵՅԱՆԸ
Ինչպես հայտնի է «Փյունիկի» գլխավոր մարզիչ է նշանակվել Արտակ Օսեյանը։ Ֆուտբոլային ճանապարհը Օսեյանը սկսել է հենց «Ուրարտուում», որի կազմում իր նորամուտը նշել է 2004 թվականին։ Օսեյանը «Ուրարտուի» կազմում անցկացրել է 79 խաղ ու դարձել 6 գոլի հեղինակ։
Հավելենք, որ Vbet Հայաստանի Պրեմիեր լիգայի «Փյունիկ» — «Ուրարտու» հանդիպումը կայանալու է առանց հանդիսականների, իսկ խաղը հեռարձակվելու է ՀՖՖ-ի յութուբյան պաշտոնական ալիքով։
