Տարին ամբողջ մոլորակի համար մեծ խնդիրներ ու դժվարություններ առաջացրեց: Վնասի չափերն այժմ արդեն դժվար է հաշվել, նույնիսկ՝ անօգուտ:
Մեծ վնաս կրեց սպորտը, մասնավորապես՝ ֆուտբոլը: Առաջնությունները դադարեցվել էին տևական ժամանակով, որոշները՝ չեղարկվել: Եվրոպա լիգան ու Չեմպիոնների լիգան այժմ արդեն վերջնարկ են հասնում՝ քառորդ եզրափակչից սկսած դիմակայությունն անցկացնելով մեկ խաղով:
ՈՒԵՖԱ-ն որոշեց օրեր անց մեկնարկող եվրոգավաթային նոր մրցաշրջանի որակավորման փուլերի դիմակայություններն անցկացնել մեկ խաղով, բացառությամբ՝ ՉԼ-ի փլեյ-օֆֆ խաղերը, իսկ դաշտի տերերն ընտրվեցին վիճակահանությամբ:
Հայաստանի գործող գավաթակիր ու սուպերգավաթակիր «Նոան» մրցակցի դերում ստացավ ոչ ավել, ոչ պակաս ղազախական «Կայրաթին», իսկ խաղը կկայանա Ալմաթիում:
Կարծիքները տարբեր են. ոմանք դիմակայության բացահայտ ֆավորիտ են համարում ղազախական թիմին, ոմանք էլ ոչ մեծ, բայց շանսեր տեսնում են՝ «Կայրաթի» արգելքը հաղթահարելու համար:
Ինչպես գիտենք, «Նոան» առայժմ ընդամենը մեկ տարվա նախագիծ է, սակայն այդ մեկ տարվա ընթացքում հասցրել է նշանակալից հաջողությունների հասնել, իսկ ներկայիս ներուժով ի զորու է կռիվ տալ «Կայրաթի» դեմ խաղում:
«Կայրաթի» պատմությունը.
«Կայրաթը» 66 տարվա պատմություն ունի: Իր պատմության ընթացքում թիմը միայն 2 անգամ է դարձել Ղազախստանի չեմպիոն՝ 1992 և 2004 թթ.: 5 անգամ դարձել է արծաթե, 5 անգամ՝ բրոնզե մեդալակիր: Կարելի է ասել, որ «Կայրաթը» գավաթային թիմ է, ինչպես՝ «Նոան»: Ղազախական թիմը ռեկորդային՝ 9 անգամ նվաճել է Ղազախստանի գավաթը, իսկ 2 անգամ նվաճել է երկրի Սուպերգավաթը:
«Կայրաթը» 8-րդ անգամ անընդմեջ կմասնակցի Եվրոպա լիգայի խաղարկությանը:
Եվրոպական ասպարեզում Ալմաթիի ամենամեծ հաջողությունը գրանցվել է 2015/16 մրցաշրջանում: Այդ մրցաշրջանում թիմը հասավ Եվրոպա լիգայի որակավորման փլեյ-օֆֆ, որտեղ ֆրանսիական «Բորդոյի» հետ դիմակայությունն ավարտվեց 2-2 հաշվով, սակայն մրցակցի հարկի տակ խփած գոլի շնորհիվ «Բորդոն» շարժվեց առաջ:
2019/20 մրցաշրջանում «Կայրաթը» Եվրոպա լիգայի որակավորման երկրորդ փուլից դուրս մնաց պայքարից:
Եթե «չոր» թվերով նայենք, ապա պետք է փաստենք, որ «Կայրաթի» կազմը տրանսֆերային արժեքով գնահատվում է 19.6 մլն եվրո, իսկ «Նոայինը»՝ 4.63 մլն եվրո: «Նոայի» «ամենաթանկարժեք» ֆուտբոլիստը գնահատվում է 300 հազար եվրո, իսկ «Կայրաթի» կազմում կան մի շարք ֆուտբոլիստներ, որոնց տրանսֆերային արժեքները 1 մլն եվրոյից ավելի են:
Կազմերը.
«Նոան» նախորդ առաջնության վերջին հատվածում պինդ ընկույզի տպավորություն էր թողնում, իսկ նոր առաջնության մեկնարկից առաջ մի քանի նշանակալից ձեռքբերումներ ունեցավ՝ էլ ավելի ամրացնելով կազմը: Սակայն, հասկանալի է, որ «Նոայի» կորիզը լեգիոներներն են: Հայ ֆուտբոլիստներից մեկնարկային կազմում իրենց տեղը կարող են ապահովագրել Արտյոմ Սիմոնյանն ու Մոնրոյ Արարատը:
Գավաթի եզրափակչում վնասվածք ստացավ «Նոայի» առաջատարներից Մաքսիմ Մայրովիչը, և այս պահին նրա մասնակցությունը «Կայրաթի» հետ խաղին հարցականի տակ է:
«Կայրաթի» կազմում մեծամասնություն են կազմում տեղացի ֆուտբոլիստները: 65 տոկոսից ավելին ղազախ են: Լեգիոներների շարքում է Հայաստանի ազգային հավաքականի անդամ Կամո Հովհաննիսյանը: Թիմում է նաև բրազիլացի հարձակվող Վագներ Լավը:
Լավն իր լավագույն տարիներին խաղացել է ռուսական ԲԿՄԱ-ի կազմում: 36-ամյա հարձակվողը վերջերս է տեղափոխվել «Կայրաթ»: Ընդհանրապես, «Կայրաթը» կարիերայի մայրամուտին գտնվող նախկինում անվանի ֆուտբոլիստներին հրավիրելու փորձ ունի: 2016-2018 թթ. ղազախական ակումբում է խաղացել նաև Անդրեյ Արշավինը:
Մարզադաշտը.
Թիմը խաղում է Ալմաթիի «Կենտրոնական» ստադիոնում, որը տեղավորում է 26242 ֆուտբոլասեր, սակայն ինչպես հայտնի է, խաղը կայանալու է դատարկ տրիբունաների ուղեկցությամբ:
Երկրպագուներ.
Երկրպագուների մասին ինֆորմացիա փնտրելիս հայտնաբերեցի, որ 2014 թ-ի մարտի 15-ից ակումբը գործածությունից հանել է 12 համարի մարզաշապիկը՝ ի պատիվ իր երկրպագուների, իսկ 2016 թ-ից ակումբն ունի պաշտոնական ֆան ակումբ՝ «AlatauFans» անվամբ:
Հայկական թիմերի դեմ խաղալու փորձ.
2015/16 մրցաշրջանում «Կայրաթը» Եվրոպա լիգայի որակավորման երկրորդ փուլում հանդիպեց այդ ժամանակվա Հայաստանի չեմպիոն «Ալաշկերտի» հետ: Ալմաթիում կայացած խաղում տանտերերը հաղթեցին 3-0 հաշվով, իսկ Երևանում «Ալաշկերտը» հաղթեց 2-1 հաշվով, սակայն ճանապարհը զիջեց ավելի զորեղ մրցակցին:
Գլխավոր մարզիչը.
Օրեր առաջ կայացած վիճակահանությունից հետո «Կայրաթի» գլխավոր մարզիչ Ալեքսեյ Շպիլևսկին նշել է, որ բարդ և էմոցիոնալ խաղ է սպասվում: Մարզիչը նշել է, որ ժամանակ ունեն մրցակցին ուսումնասիրելու համար և նշանակություն չունի, որ պաշտոնական խաղերի պակաս ունեն, քանի որ այս ընթացքում թիմն ընկերական խաղերի է մասնակցել ու լավ մարզավիճակում է:
Շպիլևսկին 2019 թ-ից է «Կայրաթում»: 2009 թ-ից է սկսել է մարզչական կարիրան՝ մարզելով գերմանական ակումբների երիտասարդական թիմեր: 2013-2018 թթ-ին մարզել է «Լայպցիգի» երիտասարդական թիմը:
Մարզիչների մեկնաբանությունը.
Խոսելով «Նոայի» հետ կայանալիք դիմակայության մասին՝ Շպիլևսկին մասնավորապես ասել է.
«Առաջին հերթին, մենք կենտրոնացած ենք առաջնությունը վերսկսվելուց հետո մեր առաջիկա խաղի վրա: Հետևաբար, դեռ կա ժամանակ մրցակցին ուսումնասիրելու, պատրաստվելու համար: «Նոայի» հետ, կարծում եմ, որ շատ թեժ, էմոցիոնալ հանդիպում է սպասվում:
Սա լուրջ մրցակից է, որի հետ դժվարին պայքար է ստացվում: Թիմն արդեն անցկացրել է պաշտոնական հանդիպումներ, նվաճել է Սուպերգավաթը երկրի չեմպիոնի դեմ խաղում: Մենք ունենք հայկական ակումբների հետ ընկերական հանդիպումներ խաղալու փորձ: Դրական է, որ մենք խաղալու ենք տանը: Իհարկե, մեր խնդիրն է նրանց հաղթել և առաջ գնալ: Բայց միևնույն ժամանակ, չպետք է թերագնահատել մրցակցին»,- ասել է Շպիլևսկին՝ ընդգծելով, որ իր թիմը լավ մարզավիճակում է մոտենում առաջիկա խաղին՝ չնայած նրան, որ պաշտոնական հանդիպումներ չի անցկացրել:
«Կայրաթը» նախորդ հանդիպումն անցկացրել է հուլիսի 1-ին:
Հայկական թիմի գլխավոր մարզիչ Իգոր Պիկուշչակը ևս իր կարծիքն է հայտնել մրցակցի ու սպասվող դիմակայության մասին.
«Հեշտ չի լինելու, «Կայրաթն» ունի շատ որակյալ ֆուտբոլիստներ՝ աստղեր։ Դրան գումարած նաև այն, որ մեզ արտագնա խաղ է սպասում, որտեղ մրցակիցը, բնականաբար, առավելություն է ստանում։ Իհարկե, փորձելու ենք որակյալ, արագ ֆուտբոլ խաղալ, բայց շատ ծանր է լինելու: Ասեմ, որ եղած 4 թիմերից ամենաքիչը կուզենայինք իրենց դեմ խաղալ»,- խոստովանել է Պիկուշչակը:
Պիկուշչակի խոսքով`«Նոայի» համար առավելություն կլինի այն, որ Ղազախստանի առաջնությունում երկար դադար է, «Կայրաթը» գարնանը մի քանի խաղ է անցկացրել, բայց հետո՝ կորոնավիրուսի համավարակի պատճառով, առաջնությունը դադարեցվել է:
Հիշեցնենք, որ «Կայրաթի» և «Նոայի» միջև հանդիպումը տեղի կունենա օգոստոսի 27-ին Ղազախստանում:
Արմեն Գարամյան
