«Մանչեսթեր Սիթի»- «Լիվերպուլ»․․․ Հանդիպում, որը կարող էր լինել չեմպիոնական Յուրգեն Կլոպի թիմի համար, սակայն դեռ նախորդ տուրում հայտնի դարձավ, որ «Լիվերպուլը» Մանչեսթեր կմեկնի արդեն Անգլիայի չեմպիոնի կարգավիճակով։
Հիշեցնենք, որ «Լիվերպուլը» 30 տարվա դադարից հետո նվաճեց ֆուտբոլի Անգլիայի չեմպիոնի կոչումը։ Նախորդ տուրում «Մանչեսթեր Սիթին» հյուրընկալվելիս 1:2 հաշվով պարտվեց «Չելսիին», որը զրկեց նրան ոչ միայն գործնական, այլեւ տեսական շանսերից՝ Անգլիայի առաջնության «ոսկե» մրցավազքում «Լիվերպուլին» հասնելու: Ճակատագրի հեգնանքով, «Լիվերպուլին» չեմպիոնություն պարգևեց «Չելսիի» հաղթանակը, շատ սիմվոլիկ կլիներ, որ նրանք այդ տիտղոսը նվաճեին «Սիթիի» հետ առաջիկա տուրում կայանալիք խաղում, բայց, կարծում եմ, թե՛ խաղացողների, թե՛ երկրպագուների համար դա արդեն այդքան էլ կարևոր չէր։
Անգլիական «Մանչեսթեր Սիթիի» գլխավոր մարզիչ Խոսեպ Գվարդիոլան խոստացել է, որ նա և նրա թիմը կկազմեն «չեմպիոնական միջանցք» «Լիվերպուլի» համար:
«Իհարկե, մենք կկազմենք «չեմպիոնական միջանցք» «Լիվերպուլի» համար: Մենք աներևակայելի ընդունելություն կկազմակերպենք նրանց համար մեր տանը: Մենք դա անելու ենք, քանի որ նրանք արժանի են դրան», – Գվարդիոլայի խոսքերն է մեջբերում Mirror-ը:
Այդ առթիվ «Լիվերպուլի» գլխավոր մարզիչ Յուրգեն Կլոպը հայտնել է իր կարծիքը։
«Նման բան ինձ հետ տեղի էր ունեցել վաղուց՝ Գերմանիայում: Վստահ չեմ, որ սա ավանդույթ է այնտեղ, բայց, իհարկե, սա գեղեցիկ ժեստ է՝ հարյուր տոկոս: Ինձ պետք չէ դա, անկեղծ ասած: Մենք գնում ենք այնտեղ ֆուտբոլ խաղալու և հաղթելու: «Լիվերպուլը» չի նշում մեկ շաբաթ առաջվա իրադարձությունները», – մեջբերում է Կլոպին Daily Mail-ը:
Ի՞նչ ակնկալել այսօրվա խաղից․․․ Որոշ մասնագետներ կարծում են, որ Կլոպի սաները արդեն այդքան էլ տրամադրված չեն լինի այս խաղին, որն, ըստ էության, մրցաշարային աղյուսակի տեսանկյունից այլևս նշանակալի չէ։ Մյուս կողմից, ինչպես Կլոպն է ասում, թիմը փորձելու է խաղալ և հաղթել՝ ապացուցելու համար, որ իրենք իսկապես ուժեղագույններն են ԱՊԼ-ում։ Իսկ ինչ վերաբերվում է «Սիթիին», ապա նրանք պետք է որ մարտական տրամադրված լինեն․ երկու թիմերն էլ կորցնելու ոչինչ չունեն մրցաշարային տեսանկյունից, սակայն ունեն ապացուցելու շատ բան։ Գվարդիոլան հավակնոտ է, թիմի ֆուտբոլիստները՝ ևս, ովքեր կցանկանան բոլորին ցույց տալ, որ ամենևին չեն զիջում «Լիվերի» ֆուտբոլիստներին։ Նույնը, ինչպես վերը արդեն նշվեց, վերաբերվում է «Լիվերպուլին»։
Ակնկալվում է շատ հետաքրքիր, անզիջում պայքար, սպասվում է, որ երկու թիմերն էլ կխաղան բաց և հարձակվողական ֆուտբոլ, այնպես որ, խաղը խոստանում է լինել ոչ ձանձրալի։ Եվ դեռ մեկ-երկու ռեկորդներ էլ կարող են գրանցվել այս երեկո․․․
«Մանչեսթեր Սիթի» – «Լիվերպուլ» հանդիպումը կկայանա այսօր՝ հուլիսի 2-ին, Երևանի ժամանակով 23։15-ին:
