Ֆուտբոլային սկաուտ․ ՌԲ Լայպցիգը՝ ապագա աստղերի դարբնոց

Այս անգամ մեր դիտակետում են Գերմանիայի ուժեղագույն ակումբներից մեկի՝ «ՌԲ Լայպցիգի» երիտասարդ և հեռանկարային ֆուտբոլիստները, ովքեր Բունդեսլիգայի վերջին մրցաշրջանում լավագույններից մեկն էին իրենց դիրքերում։

Դայո Ուպամեկանո

🇫🇷 Ֆրանսիա
«ՌԲ Լայպցիգ»
21 տարեկան

Արդեն մի քանի տարի է, ինչ միջազգային մամուլում շրջանառվում է Ուպամեկանոյի անունը՝ կապելով նրան այս կամ այն գրանդ ակումբի հետ։ Եվ ակամայից թվում է, որ խոսքը բավականին փորձառու ֆուտբոլիստի մասին է, բայց, մեկ րոպե․․․ նա ընդամենը 21 տարեկան է։ Ինչպես «ՌԲ Լայպցիգի» մի քանի այլ խաղացողներ, ֆրանսիացի պաշտպանը գերմանական ակումբ է տեղափոխվել Red Bull-ի մեկ այլ ակումբից՝ ավստրիական «ՌԲ Զալցբուրգից»։ Նա արդեն երրորդ մրցաշրջանն է, ինչ համարվում է թիմի հիմնական կազմի ֆուտբոլիստ, իսկ վերջին մեկ-երկու տարիներին նա ընդհանրապես Եվրոպայի ամենահեռանկարային պաշտպաններից մեկն է։ Դայոն աչքի է ընկնում իր տարիքի համար բավականին հասուն և պաշտպանությունում հուսալի խաղով, ունի առաջատարի հատկանիշներ, համարվում է թիմի պաշտպանական գործողությունների գլխավոր համակարգողը խաղադաշտում։ Այնպես որ, «ցլերը» դժվար թե նրանից հեշտությամբ բաժանվեն և ֆրանսիացի պաշտպանի հավանական նոր ակումբը պետք է բավականին կլորիկ գումար վճարի նրա տրանսֆերի դիմաց։

Նորդի Մուկիելե

🇫🇷 Ֆրանսիա
«ՌԲ Լայպցիգ»
22 տարեկան

Մուկիելեն արդեն երկրորդ մրցաշրջանն է անցկացնում «ՌԲ Զալցբուրգի» կազմում։ Միշել Տեր-Զաքարյանի նախկին սանը «Մոնպելյեից» գերմանական ակումբ տեղափոխվելուց հետո բավականին արագ հարմարվեց նոր առաջնությանը։ Աջ պաշտպանի դիրքում հանդես եկող Նորդին այս մրցաշրջանում լուրջ խաղային աճ է գրանցել և արդեն իսկ հայտնվել է մի շարք գրանդ ակումբների դիտակետում։ Նա շատ տաղանդավոր է, աշխատասեր ու շատ ակտիվ խաղադաշտում, սակայն դեռ զգացվում է փորձի պակասը, և հուսալիության տեսանկյունից դեևս մի փոքր զիջում է մեր նախորդ հերոսին։ Ի տարբերություն նույն Ուպամեկանոյի, նա ավելի շատ է առաջ գնում՝ միանալով թիմի գրոհներին և պատահական չէ, որ նա 3 գոլի հեղինակ է դարձել Բունդեսլիգայի այս մրցաշրջանում։

Դանի Օլմո

🇪🇸 Իսպանիա
«ՌԲ Լայպցիգ»
22 տարեկան

Դանիել կամ պարզապես Դանի Օլմո․․․ Ֆուտբոլիստ, ով իրեն անուն ստեղծեց ոչ թե հայրենիքում՝ Իսպանիայում, այլ Խորվաթիայի առաջնությունում։ Զագրեբի «Դինամոյի» կազմում հրաշալի մրցաշրջանից հետո շատերը նրան տեսնում էին իսպանական կամ իտալական առաջատար ակումբներից մեկի կազմում, սակայն երիտասարդ ֆուտբոլիստը նախընտրեց տեղափոխվել գերմանական ակումբ։ Հավանաբար նոր թիմի ընտրության մեջ մեծ էր երիտասարդ մարզիչ Յուլիան Նագելսմանի գործոնը, ով բավականին լավ և արդյունավետ է աշխատում տաղանդավոր և հեռանկարային ֆուտբոլիստների հետ, իսկ եվրոպական գրանդները դեռ կսպասեն։ Օլմոն դեռ 22 տարեկան է, նա արդեն հրավիրվում է Իսպանիայի հավաքական, այնպես որ, հրաշալի տեխնիկայով աչքի ընկնող ֆուտբոլիստի մոտ դեռ ամեն ինչ առջևում է։

Կոնրադ Լայմեր

🇦🇹 Ավստրիա
«ՌԲ Լայպցիգ»
23 տարեկան

Կարո՞ղ եք գուշակել՝ որ ակումբից է ավստրիացի ֆուտբոլիստը տեղափոխվել «ՌԲ Լայպցիգ»․ այո՛, ճիշտ եք՝ «ՌԲ Զալցբուրգից»։ Լայմերը «ցլերի» կազմում արդեն երրորդ մրցաշրջանն է անցկացնում և ամեն տարի կիսապաշտպանը է՛լ ավելի հաջող է հանդես գալիս։ Ամենահաս Լայմերը խաղում է կիսապաշտպանության կենտրոնում, սակայն հաջողությամբ գործում է նաև հենակետայինի դիրքում, իսկ հարկ եղած դեպքում կարող է տեղափոխվել աջ եզր։ Նրա ունիվերսալությունը շատ մեծ նշանակություն ունի Նագելսմանի համար․ Լայմերը, այսպես ասած, կապող օղակ է համարվում թիմի պաշտպանական և հարձակման գծերի միջև։ Իսկ այս մրցաշրջանի հանդիպումներում նկատելի էր, որ նա սկսել է ավելի հաճախ միանալ գրոհներին և տիրապետում է բավականին լավ հեռահար հարվածների, իսկ փոխանցումների ճշգրտության տեսանկյունից նա լավագույններից մեկն է թիմի կազմում։

Քրիստոֆեր Նկունկու

🇫🇷 Ֆրանսիա
«ՌԲ Լայպցիգ»
22 տարեկան

Այսօր մեր դիտակետում գերմանական ակումբ է, սակայն խոսում ենք արդեն երրորդ ֆրանսիացի ֆուտբոլիստի մասին։ Ընդհանրապես, Նագելսմանի գլխավորությամբ բավականին երիտասարդ և ինտերնացիոնալ կազմ է հավաքվել։ Նախորդ ամառ, երբ «ցուլերը» ՊՍԺ-ից ձեռք բերեցին հերթական ֆրանսիացի ֆուտբոլիստին՝ Նկունկուին, քչերի մտքով էր անցնում, որ Լայպցիգ է տեղափոխվում 2019/20 մրցաշրջանի ապագա լավագույն ֆուտբոլիստներից մեկը։ Արագաշարժ, ֆուտբոլային ինտելեկտով օժտված և տեխնիկապես հագեցած այս ֆուտբոլիստը շատ կարճ ժամանակահատվածում դարձավ «ՌԲ Լայպցիգի» առաջատարներից մեկը։ Մրցաշրջանի արյունքներով Նկունկուն դարձավ 5 գոլի հեղինակ և ևս 13 անգամ օգնեց իր թիմակիցներին գրավել մրցակիցների դարպասը։ Ընդհանրապես, գոլային փոխանցումների քանակով նա Բունդեսլիգայում զիջեց միայն Թոմաս Մյուլերին և Ջեյդոն Սանչոյին։ Վերների հեռանալուց հետո թիմին նոր առաջատար է պետք, ով իր հետևից կտանի մյուս ֆուտբոլիստներին և կկատարի թիմի առաջատարի դերը, և այժմ, կարծես թե արդեն ակներև է՝ ում ուսերին կդրվի այդ պարտականությունը․․․

Վար Բաբայան

Շարքի նախորդ մասերը

Դեղձանիկները դեռ կճախրեն ֆուտբոլային երկնակամարում

Շոտլանդիայի առաջնության ամենահեռանկարային ֆուտբոլիստները

Լավագույնները Ա Սերիայի նկուղում

Ամերիկացիների երիտասարդ դեսանտը Եվրոպայում

Բեռլինում նոր աստղեր են հասունանում

Այս հիանալի Զալցբուրգը․․․

Երիտասարդ գլադբախցիներն ու դեղագործները՝ համաշխարհային ֆուտբոլի ապագա աստղեր

Ֆրանսիայի առաջնության գլխավոր բացահայտումները

Հաշվենկատ Վերոնան և հավակնոտ Բոլոնյան՝ ցատկահարթակ ֆուտբոլային էլիտա

Քեյ-ֆուտբոլի (K-Football) ակնկալիքով