«Մանչեսթեր Սիթիի» և Ալժիրի հավաքականի կիսապաշտպան Ռիյադ Մահրեզը խոսել է Աֆրիկայի գավաթի խաղարկության մասին:
«Աֆրիկայի գավաթը պետք է անցկացվի ամռանը՝ յուրաքանչյուր 4 տարին մեկ: Եգիպտոսում [2019-ի ամառ] հիանալի էր, ոչ շատ շոգ:
Աֆրիկյան ֆուտբոլը չեն հարգում, քանի որ այս մրցաշարը տեղի է ունենում ձմռանը՝ երկու տարին մեկ անգամ: Խաղացողները մրցաշրջանի կեսից երկու ամսով լքում են ակումբները», — մեջբերում է ֆուտբոլիստին DZfoot-ը:
Ավելի վաղ հայտնի էր դարձել, որ Աֆրիկայի Գավաթ-2021-ը կտեղափոխվի 2022 թվական, այդ մասին հայտնել էր beIN Sports-ի լրագրող Մոհամեդ Նեջարին:
Աֆրիկայի Գավաթ-2021-ը պետք է կայանար հաջորդ տարվա ձմռանը Կամերունում: Ավանդաբար այդ մրցաշարն անցկացվում է 2 տարին մեկ՝ հունվարից փետրվարն ընկած ժամանակահատվածում, սակայն անցած տարի մրցաշարը կայացավ ամռանը: Աֆրիկյան ազգերի գործող գավաթակիրն Ալժիրն է:
